Raqiblar zo'r, lekin o'yin bo'ladigan joy...

Ammo shu erda bitta LEKIN bor va masalaning mana shu lekini haqida quyida fikr yuritamiz. Urugvay - kuchli raqib, tarkibida Suares-u Kavanilar o'ynaydi. Bundan tashqari bu jamoa jahon chempionatiga chiqqan.

Terma jamoamiz Urugvay bilan o'yingacha uchta o'rtoqlik uchrashuvi o'tkazadi va uchala raqib ham jahon chempionati ishtirokchilari: Senegal, Marokash va Eron. To'rtinchi raqib esa Urugvay. Etiborli tomoni shundaki, biz hamma o'yinlarni safarda o'tkazamiz. Senegal va Marokashga qarshi maydonga tushish uchun shu oyning ikkinchi yarmida Afrikaga boramiz.

Mayda Tehronga yo'l olamiz, iyunda esa Janubiy Amerika tomon uchamiz. Senegal va Marokashga qarshi bitta shaharda (balki ikkala o'yin bitta stadionda bo'lishi mumkin) o'ynashimizni hisobga olsak, bu borada muammo tug'ilmaydi. Lekin may oyidagi safar birmuncha qiyinchiliklarni keltirib chiqarishi mumkin. Birinchidan, may oyida FIFA kunlari yo'q, qolaversa Eron o'zida qabul qilgani uchun tarkib borasida katta qiyinchilikka duch kelmaydi.

Biz esa Tehronga boramiz. Agar charterdan foydalanmasak, katta ehtimol bilan Istanbul orqali uchsak kerak. Demak, ikkita reys qilishimizga to'g'ri keladi.14-15 mayga OCHL 1/8 final uchrashuvlari belgilangan. O'FA sayti Eron bilan o'yin 15 may deb yozdi, ammo dastlabki malumotlarga ko'ra 18 may edi. Qolaversa, eronliklar ham o'yin 18 mayda bo'ladi deb yozishmoqda.

Har qanday holatda 15 mayda o'yin o'tkazishning imkoni bo'lmaydi, chunki shu kuni OCHL bor. Mayli, Tehronga borib-kelish u qadar muammo bo'lmas, lekin iyunda Janubiy Amerikaga uchamiz. Aytish mumkinki, dunyoning narigi chetiga. Bunda ham charter reys amalga oshirilmasa kerak. Axir Montevideoga charter orqali borib kelishning o'zi bo'ladimi.

Urugvay bilan bahs 7 iyunga qo'yilgan. Lekin muammo shundaki, shu kuni taqvimda Superliga uchrashuvlari yozilgan. 7-8 iyun kunlari Superliganing 15-tur bahslari o'tkaziladi. Yoki Urugvay muhimroq deb o'yinlarni boshqa kunga qoldiramizmi? O'zi shundoq ham 1-turdagi "Metallurg" - "Navbahor" uchrashuvi 2 martdan 4 martga, 2-turda o'z maydonida o'ynashi kerak bo'lgan "Qo'qon-1912" bahsi Navoiyga ko'chirildi.

Bundan tashqari, iyunda FIFA o'rtoqlik uchrashuvlari uchun konkret kunlar belgilamagan. Bunda har bir jamoa o'ziga maqul kun va raqib topib o'ynayveradi. Masalaning shu tomoniga qaraydigan bo'lsak, bu uchrashuv ko'proq Urugvay foydasiga xizmat qiladigandek. Ularning JCHdagi guruhida Saudiya Arabistoni va Rossiya bor. Biz Saudiya bilan ko'p o'ynaganmiz, Rossiya futboliga yaqinroqmiz. Albatta, Urugvay ham shularni o'ylagan va O'zbekiston bilan uchrashuv o'tkazishga rozi bo'lgan.

Qizig'i shundaki, Urugvay bizga qarshi o'ynab bo'lganidan keyin Rossiyaga yo'l oladi. Biz esa Toshkentga qaytamiz. 3 iyunga ham Superliga o'yinlari qo'yilganini hisobga olsak, terma jamoa ertasi kun yig'ilib 4 yo 5 iyun kuni darhol uchib ketishiga to'g'ri keladi. Xullas shuncha yo'l bosib Urugvayga boramiz, o'yindan so'ng yana ming mashaqqat bilan ortga qaytamiz. Kim biladi deysiz, balki yo'lning o'ziga bir sutka ketar.

Urugvay nima qiladi? Bironta mehmonxonaga yig'ilib bizni kutadi, ikki soatlik o'yindan so'ng yana mehmonxonasiga qaytib ketadi. Endi savol tug'iladi: modomiki Urugvay biz bilan o'ynab bo'lgach Rossiyaga uchar ekan, Rossiyada bo'lmasa-da shunga yaqinroq o'lkalardan birida shu o'yinni tashkil qilsa bo'lmasmidi. Har holda Evropaning biror bir davlatida, mayli urugvayliklar Osiyoga kelmasin, balki Turkiyada, balki Polsha yoki Avstriyada.

Uzoq yurtlarga safar qilgan odam biladi: yo'l azobi - go'r azobi deb bekorga aytilmagan. Qolaversa, futbolchilarni harqancha professional demaylik, ular ham odam. Ularda ham fiziologiya bor, vaqt farqi, ob-havoga moslashish deganlaridek. Albatta, biz kuchli jamoalarga doim labbay deb javob berishimiz kerak, chunki hozirgi vaziyat shuni taqozo qilyapti. O'zimiz harakat qilmaguncha kuchli jamoalar kelinglar o'ynaymiz demaydi. Lekin boshqa tomondan raqib bilan kelishayotganda o'yin qachon bo'ladi, qaerda o'ynaymiz, yo'l sharoiti bizga ham qulaymi kabi savollarni o'ylab ko'rsak yomon bo'lmasdi.

Masalan, o'sha Urugvayga yaxshisi sizlar Toshkentga kelinglar, keyin buyog'i Rossiya - bir qadam, to'g'ri shu erdan uchib ketaverasizlar deb ko'raylik-chi, qani ular nima derkin?