"CA" Superligani yangicha formatda yoritadi
Ushbu turda bir qator futbolchilar o'z o'yinlari bilan o'z jamoalariga foyda keltirish bilan birgalikda muxlislar olqishiga sazovor bo'lishdi.
Ramziy terma jamoa darvozasini tur qahramonlaridan biriga aylangan Murodjon Zuhurovga ishonib topshirdik. Mudofaa chizig'i vakillari ham ushbu turda jamoalari joniga oro kirishdi. Xususan Murod Xolmuhammedov nafaqat mudofaani yaxshi qo'riqladi, balki jamoasi uchun muhim bo'lgan golni ham urishga muvaffaq bo'ldi. Rustam Ashurmatov esa derbida jamoasiga haqiqiy qalqon bo'ldi, desak mubolag'a bo'lmaydi. Ashurmatov o'zining asosiy vazifasini uddalash bilan birgalikda "qaldirg'ochlar"ga g'alaba keltiruvchi golga ham mualliflik qildi. Jizzaxda kechgan "So'g'diyona" - "Neftchi" o'yinida Akmal Xolmurodov mezbonlar himoya chizig'ini bir maromda ushlab turishda katta xizmat ko'rsatdi. "Navbahor"ning chap qanot himoyachisi sifatida o'ynagan Darko Stanoevich ham Olmaliqda AGMKga qarshi o'yinda ancha ishonchli harakat qilgani bois ramziy terma jamoa tarkibidan o'rin oldi.
Yarim himoya chizig'i 2-turda eng faol va sermahsul o'ynagan futbolchilar bilan to'ldirildi. "Navbahor" vingeri Azizbek Turg'unboev so'zsiz turning eng yaxshi futbolchisi sifatida ramziy terma jamoadan o'rin oldi. SHuningdek, "Qo'qon-1912" jamoasining iqtidorli futbolchisi Muhammadanas Hasanov ham "Qizilqum"ga qarshi bahsda yorqin futbol ko'rsatdi va haqli ravishda eng yaxshilar qatoridan o'rin oldi. "Nasaf"ning dirijyoriga aylanib borayotgan Azizbek G'aniev "Buxoro" bilan bo'lgan bahsda juda faol o'ynadi. G'aniev jamoasi uchun muhim bo'lgan tenglashtiruvchi golni urish bilan birgalikda butun uchrashuv davomida bir tekisda jamoasi o'yinini qurishda faol bo'ldi. Jasur Hasanov esa shu kuni maydondagi eng yaxshilar qatori bo'ldi. Ro'ziqul Berdiev qo'l ostida yana o'zining optimal sport formasini taklayotgan Hasanov qanotdagi reydlari orqali raqib himoyasiga tinchlik bermadi. Aynan Hasanovning to'p uzatishidan Abdixoliqov gol urgan bo'lsa, Lukichning jarimadan urgan golida ham Hasanovning xizmati bo'ldi. CHunki aynan Hasanovga nisbatan ishlatilgan qo'pollikdan so'ng Slavko Lukich jarima zarbasidan unumli foydalandi.
Hujum chizig'i vakillaridan jamoasi uchun muhim gollarni kiritgan Bobir Abdixoliqov hamda Pavel Purishkin tur ramziy terma jamoasidan o'rin olishdi. Bobir Abdixoliqov nafaqat muhim gol muallifiga aylandi, balki butun bahs davomida Mullajonov va Filiposyan tandemiga etarlicha tashvish tug'dirdi. Pavel Purishkin esa zaxiradan maydonga tushiboq chempion jamoa uyidan "Metallurg" 1 ochko bilan qaytishini taminlovchi gol muallifiga aylandi.
Superliga, 2-tur ramziy terma jamoasidan o'rin olgan futbolchilar (4-4-2):
Darvozabon: Murodjon Zuhurov ("Bunyodkor")
Himoyachilar: Murod Xolmuhammedov ("Qo'qon-1912"), Rustam Ashurmatov (Bunyodkor"), Akmal Xolmurodov ("So'g'diyona"), Darko Stanoevich ("Navbahor")
Yarim himoyachilar: Muhammadanas Hasanov ("Qo'qon-1912"), Azizbek Turg'unboev ("Navbahor"), Aziz G'aniev ("Nasaf"), Jasur Hasanov ("Nasaf").
Hujumchilar: Bobir Abdixoliqov ("Nasaf"), Pavel Purishkin ("Metallurg").
Bosh sahifaga
90