Uchrashuvdan so'ng bahsni asosiy tarkibda boshlagan farg'onaliklarning mohir himoyachisi Husniddin G'ofurov "Neftchi" rasmiy saytiga intervyu berdi. G'ofurov jizzaxliklarga qarshi bellashuv borasida munosabat bildirar ekan, mana shunday injiq ob-havo sharoitida ham jamoalarni qo'llab-quvvatlab borgan muxlislarga alohida minnatdorchilik bildirdi.
- Fikrim avvalida barcha muxlislarga rahmat aytib qolaman. Aytish kerakki, o'yin vaqtida bo'lgan qattiq shamol tufayli nafaqat to'p surish, balki tribunada turib o'yinni tomosha qilish ham mushkul sanaladi. SHunga qaramay, ishqibozlar uchrashuv yakuniga qadar futbolchilarni qo'llab-quvvatlab borishdi. Farg'ona va Jizzax orasidagi masofa uzoq bo'lishiga qaramay, Vodiydan ham ko'plab "Neftchi" muxlislari 2-tur o'yiniga etib kelishdi. Muxlislarning daldasi futbolda juda muhim deb o'ylayman.
- Husniddin, bu yil Superliga bahslari ancha qizg'in va murosasiz ruhda kechmoqda. SHu qatori "So'g'diyona" va "Neftchi" jamoalari o'rtasidagi o'yin ham yuqori suratda kechdi. Uchrashuv borasidagi fikrlaringiz bilan o'rtoqlashsangiz?
- Joriy mavsumda xar bir o'yindagi ochkolar juda qimmatli sanaladi. Aslida jamoa oldiga "So'g'diyona"ni mag'lub etish vazifasi qo'yilgandi. Lekin afsuski bahsda gol kirita olmadik. SHu qatori bu vazifani raqib jamoa ham uddasidan chiqmadi. Lekin oz bo'lsada, bir ochkoga ega chiqdik.
- Ob havoning injiqliklari ham natijaga tasir qildi.
- SHubhasiz! Kuchli shamol tufayli nafaqat biz balki "So'g'diyona" ham o'z imkoniyatlarini to'liq namoyish eta olmadi. Birinchi bo'limda mezbonlar ko'proq hujum qilgan bo'lsa, navbatdagi taymda bizda vaziyatlar ko'proq bo'ldi. Ochig'i, menda to'p darvozaga kirishni istamagandek tasavvur uyg'ondi.
- Keyingi tur Farg'onada bo'ladi. Mazkur bellashuvda farg'onalik muxlislar "Neftchi"dan ilk g'alabani kutishlari aniq. To'g'rimi?
- Ha to'g'ri aytdingiz. Diqqat etiborimiz "Bunyodkor" bilan bo'lib o'tadigan o'yinga qaratilgan. Biz xar bir bahsda g'alaba uchun maydonga tushamiz. Nasib qilsa, uchinchi turda Farg'ona ahlini xursand qilamiz.
Hojiakbar Jabborov suhbatlashdi
Bosh sahifaga
1788