Bahsni asosiy tarkibda boshlagan futbolchi o'zida yaxshi taassurot qoldirdi. Ayni paytda bayram munosabati bilan qisqa tatilga chiqqan futbolchi bilan bog'landik.
- Sunnattila, 3-turga kelib Farg'ona jamoasi safida ilk marta maydonga tushdingiz. Taassurotlar qanday?
- Taassurotlar ijobiy bo'ldi. Murabbiylar menga ishonch bildirib, asosiy tarkibda maydonga tushirishdi. Bunday imkoniyatdan samarador foydalanib o'zimni ko'rsatishga harakat qildim. “Neftchi” safida maydonga tushganimdan xursandman.
- “Bunyodkor” bilan o'yin haqidagi fikrlaringiz bilan o'rtoqlashsangiz?
- O'zingiz guvohi bo'ldingiz, juda shiddatli raqobat kechdi. Maydonning xar bir qarichi uchun kurash bo'ldi. Raqibni mag'lub etishni o'z oldimizga maqsad qilib maydonga tushgandik. Afsuski, ko'zlagan natijamizga erisha olmadik. Toshkentliklarga bosim uyushtirdik va gol kiritish uchun xavfli vaziyatlarni yuzaga keltira oldik. Lekin bir qarashda, to'p darvozaga kirishni istamagandek tuyuldi. Muxlislar ham ko'rib turgandi. G'alaba yo'lida chin yurakdan mehnat qildik. Bu futbol, gohida g'alaba gohida mag'lubiyat bo'ladi. Bu o'yin shunday ediki, bitta gol natijani belgilab berardi. Yakunda ham shunday bo'ldi.
- “Bunyodkor” jamoasi haqida nima deysiz?
- Kuchli va hamjixat tarkibga ega jamoa hisoblanadi. Ancha yillardan beri birga o'ynab kelishmoqda. Raqib tarkibida alohida kimnidir ko'rsatmagan bo'lardim. Umuman olganda, yaxshi jamoa sanaladi.
- “Neftchi”ning g'alabasiga nima etishmadi?
- CHempionatga bir oy qolganda yangi jamoa tashkillandi. Tarkib yomon emas. Murabbiylar yaxshi saviyadagi ijrochilarni jamlagan. Agar o'z ustimizda ishlab, mehnat qilishda davom etsak ijobiy natijalar qayd etamiz. SHu o'rinda, bir narsani alohida aytib o'tmoqchiman “Neftchi” jamoasi hali o'z so'zini aytadi.
- Taqvim “Neftchi”ga ketma-ket qiyin raqiblarni ro'baro etyapti. Keyingi tur “Paxtakor”ga qarshi Toshkentda kechadi. Bo'lajak o'yindan nimalar kutyapsiz?
- “Paxtakor” – aqlli jamoa. Safarda oson o'yin bo'lmaydi albatta. Buni barcha yaxshi tushunib turibdi. Toshkentliklarning kuchli tarafi bu ularning legioner futbolchilarida deb o'ylayman. Lekin raqib maydoniga faqat va faqat g'alaba qozonish uchun boramiz. Bu mavsumda niyatlarimiz jiddiy sanaladi.
- Muxlislardan nima so'ragan bo'lardingiz?
- Ishqibozlarning daldasi biz uchun muhim hisoblanadi. Nasib qilsa, ularning ishonchini oqlaymiz. Hali jamoamiz nimalarga qodir ekanligini ko'rsatib qo'yamiz. O'tgan turdagi mag'lubiyatdan fojia yasash kerak emas. CHempionat endi boshlandi. G'alabali kunlar oldinda
Hojiakbar Jabborov suhbatlashdi
Bosh sahifaga
232