Bazilar sog'ligi yomonlashgani sabab futboldan ketsa, bazi futbolchilar esa avvalgidek o'ynay olmay qolgani sababli maydonni tark etadi. Lekin yoshi ancha katta bo'lishiga qaramay, haligacha jismonan baquvvat, kuchli jamoada asosiy rollarni o'ynaydigan futbolchilar ham yo'q emas. Stenli Metyuz 41 yoshida “Oltin to'p”ni yutgan. Rayan Giggz 40 yoshida ham MYU tarkibida eng yaxshi o'yinchilardan biri bo'lgan. Drogba 37 yoshida o'rtacha hisobda har o'yin gol urardi.
Bugun 35 yoshdan oshganiga qaramay, o'zini yaxshi formada saqlab kelayotgan kuchli o'yinchilar haqida suhbatlashamiz.
Zlatan Ibragimovich, “Manchester Yunayted”, 36 yosh
Keldi, ko'rdi, g'alaba qozondi — Ibraning har qanday yangi klubga o'tganini ana shunday tariflash mumkin. SHved ulg'aygan sari, yana ham ko'proq gol urmoqda. Biroq, bu mavsumda jarohatlar tufayli maydonga tusholmadi. Kecha u MYUni tark etganini rasman elon qildi. Zlatan MLSga jo'nab ketadi. U erda tinmay darvozani ishg'ol qilishiga shubha yo'q. Agar yaxshi maosh taklif qilishsa, Ibra hozir ham Evropaning kuchli klublaridan biriga o'tib ketishi mumkin.
Petr CHex, “Arsenal”, 35 yosh
CHex “CHelsi”dagiga nisbatan, kanonirlar tarkibida biroz sust o'ynamoqda. U bazida juda yaxshi o'ynaydi, bazan esa aksincha. Lekin baribir u avvalgidek baquvvat emas. SHunday bo'lsada, Petr — klubning asosiy darvozaboni va ligadagi boshqa posbonlar bilan solishtirganda ancha yaxshi o'ynaydi.
Pepe, “Beshiktosh”, 35 yosh
Bir yil avval Pepe “Real” klubi tarkibida o'zining uchinchi CHempionlar Ligasi Kubogini qo'lga kiritgan edi. U ketganidan so'ng, “qaymoqranglilar”ning mudofaa markazi biroz oqsab qoldi. Klub va portugaliyalik yangi shartnoma imzolashmadi va Kuarejma vatandoshini Turkiyaga ko'chib o'tishga ko'ndirdi. Pepe hozir “Beshiktosh” shanini himoya qilmoqda va takidlash lozim, yomon o'yin ko'rsatmayapti.
Andrea Barcali, “Yuventus”, 35 yosh
Italiyalik himoyachi shu yoshida ham uncha-muncha himoyachidan qolishmagani sabab, Rugani hamon muntazam ravishda maydonga tushmayapti. “Uzunquloq gaplarga” qaraganda, yaqin kunlarda “keksa senora” yaqin kunlarda Andrea bilan shartnomani yana bir yilga uzaytirish niyatida.
Fabio Kvalyarella, “Sampdoriya”, 35 yosh
Hujumchining yoshi ulg'aygan sari, tezligi ham pasayib bormoqda. Unga hattoki texnikasi ham yordam bermayapti. Biroq Kvalyarella bunga unchalik ham katta ahamiyat berayotgani yo'q. CHunki, Italiya A Seriyasi jadvalidagi eng yaxshi bombardirlar ro'yhatiga nazar tashlasangiz, o'zingiz hammasini tushunib olasiz.
David Vilya, “Nyu-York Siti”, 36 yosh
Jimgina o'tirib, katta maosh olib faoliyatini yakunlash albatta yaxshi. Lekin bu David Vilya haqida emas. Ispaniyalik 3,5 yil ichida MLSda 101 o'yinda 66ta gol urdi va 2 marotaba musobaqaning ramziy termasi tarkibiga kiritildi. O'tgan yili avgust oyida esa uni Ispaniya terma jamoasiga taklif qilishdi. Kim bilsin, balki Rossiyadagi Jahon CHempionatida uni ham uchratarmiz?!
Aris Aduris, “Atletik Bilbao”, 37 yosh
Qisqa qilib aytganda –Aduris haqida qisqa gapirib o'tib ketib bo'lmaydi. U alohida maqola yozishga loyiq. Yaqin kunlarda siz uni albatta o'qiysiz.
Janluidji Buffon, “Yuventus”, 40 yosh
Bugungi ro'yxatimizdagi o'yinchilarning har biri haqida kitob yozsa arziydi. Lekin Jijji to'g'risida yozadigan bo'lsak, o'nlab kitob yozsak ham kamlik qiladi. 40 yoshda bo'lishiga qaramay, u hali ham “Yuventus”ning muhim o'yinchisi hisoblanadi. Bu yil CHLda g'olib bo'lish uchun uning so'nggi imkoniyati bor. Qiziq, buni uddalay olarmikan?! Raqib yana o'sha “Real”. O'tgan mavsum aynan “Qirollik klubi” Buffon orzusiga bir qadam qolganda, uyga quruq qo'l bilan qaytishiga sababchi bo'lgandi. Agar u mukofotni qo'lga kiritsa, bu buyuk futbolchi va buyuk insonning faoliyati yakunidagi eng ajoyib hodisa bo'lishi aniq.
Nozima Zaripova tarjima qildi
Bosh sahifaga
2023