Barchamiz sevib tomosha qiladigan "Suyunchi" filmidagi bitta epizod hammaning yodida qolgan. Ota-bolalar futbol o'ynab uyga qaytayotganida ota va o'g'li o'rtasida dialog kechadi. O'g'li dadasidan "Ada, endi kim bilan o'ynaymiz? Bizdaka komanda yana qatta bor?" deb so'raganida SHermat rolini qoyillatib ijro etgan Husan SHaripov shunday javob beradi: "Menimcha, negrlarda bo'lsa kerak, negrlaram serfarzand xalq. Oldin respublika, keyin jahon miqyosiga chiqib olamiz, ha, o'g'lim".
Mana, endi o'sha kunlar keldi. Bugun biryo'la ikkita jamoamiz Afrikaning serfarzand xalq jamoalariga qarshi maydonga tushadi. Andijonda O'zbekiston U-23 terma jamoasi Keniya bilan bellashsa, Marokashning Kasablanka shahrida milliy terma jamoamiz Senegalga qarshi bahs olib boradi. O'yinlar biz uchun juda qulay vaqtga qo'yilgan. Andijondagi bahs 20:00da, Afrikadagi o'yin esa 23:00da start oladi. Har ikkala uchrashuv "Sport" telekanali orqali to'g'ridan-to'g'ri efirga uzatiladi.
Raqiblar haqida gapiradigan bo'lsak, Keniya to'g'risida deyarli hech narsa bilmaymiz. Bu mamlakat sportda asosan engil atletikachilari bilan mashhur. Olimpiada o'yinlarida uzoq masofaga yugurishmi, marafon deysizmi nuqul mana shu Keniya tomondagilar o'zlarini ko'rsatadi. Ammo ular futbolda hali hech nimani qoyillatmagan. Senegal esa Keniya oldida butunlay boshqa saviyadagi jamoa. Aytish mumkinki, juda kuchli raqib. Bejizga bu jamoa jahon chempionatiga chiqqani yo'q.
Afrika jamoalari timsolida bugun o'zimizga baho berib olsak ajab emas. Bugun ko'pchilikning etibori milliy terma jamoaga qaratilishi shubhasiz. CHunki jamoa yangi murabbiy qo'l ostida o'ynaydi. Vaqtincha bosh murabbiy etib tayinlangan Timur Kapadze bugun ilk uchrashuvda futbolchilarni boshqaradi. Bugungi bahsda Kapadze Qosimovga yordam beradimi yo Qosimov Kapadzegami, bir narsa deyish qiyin. Buni o'yin davomida ko'rib olamiz.
Nima bo'lgan taqdirda ham, ikkala jamoamizga omad tilaymiz. SHu o'rinda O'FAga alohida minnatdorchilik bildirsak arziydi. CHunki jahon chempionatiga chiqqan jamoa bilan o'rtoqlik uchrashuvi o'tkazish hammaga emas. Aynan yangilangan O'FA rahbariyatining say-harakati tufayli biz Senegal va Marokash kabi kuchli jamoalar bilan o'ynash baxtiga erishdik. Nuqul Iordaniya, Ozarbayjon kabilar bilan o'ynayverish ortda qolgani rost bo'lsin.
Bosh sahifaga
465