Buffon: "Ronaldu "qotil", Messi esa umuman boshqa toifadagi futbolchi"

- Messi va Ronaldu butunlay boshqa-boshqa toifadagi futbolchilar hisoblanadi. Messi ko'p qirrali futbolchi. Leo texnik jihatdan yuqori salohiyatga ega, u ko'proq orqaroqqa qaytib o'ynaydi. Messining maydonni ko'rish, o'yinni o'qish qobiliyati yuqori. Messi hujumlarni yakunlovchi emas, balki himoya va hujum o'rtasida bog'lam yaratadigan trekvartista sanaladi.

Krishtianu Ronaldu esa jarima maydonchasi ichidagi haqiqiy "qotil"ga aylanmoqda. Balki bu uning yoshi bilan bog'liqdir. Hozirgi Ronalduning avvalgi Krishtianudan farqi shuki, ayni paytda futbolchi kuchini tejagan holda o'ynamoqda. Ronaldu avvalgidek qanotlarga o'tib fint yoki reydlarni ko'p ham uyushtirmay, o'z o'ljasini jarima maydonchasi ichida kutmoqda. Ronaldu istalgan kichik vaziyatdan ham gol uradigan haqiqiy "qotil"ga aylangan.