Ushbu o'yindagi natija biz uchun muhim ahamiyatga ega. Nega deysizmi? Sababi 4 may kuni Osiyo Kubogi-2019 final bosqichiga qura tashlanadi. Unda jamoalar FIFA reytingiga qarab savatchalarga ajratiladi. Ayni paytda O'zbekiston 72-o'rinda va ikkinchi savatchadamiz. Agar bugun biz Marokashga yutqazsak va Osiyo Kubogi-2019 saralashi doirasidagi Qirg'iziston - Hindiston uchrashuvida maydon egalari g'alaba qozonishsa O'zbekiston uchinchi savatchaga tushib qoladi.
Yani Marokashga yutqazsak keyingi oy FIFA reytingida katta ehtimol bilan kuchli 100talikni tark etamiz.
Ko'pchilik terma jamoalar nima uchun FIFA kunlarida bitta kuchli va bitta kuchsiz jamoa bilan o'ynashlari aynan shu bilan bog'liq. Yani jamoalar FIFA reytingidagi o'rnini yaxshilab turish uchun ham kuchsizroq raqib bilan o'ynab uni mag'lub etishga harakat qiladi.
Balki bu noshukurlikdek tuyulishi mumkin, ammo faqat kuchli jamoalar bilan o'ynayverish ham noto'g'ri ekan.
Masalan, Senegal O'zbekistondan so'ng Bosniya va Gercegovina bilan o'ynaydi. Marokash esa bizdan oldin kuchliroq bo'lgan Serbiya bilan kuch sinashdi. O'zbekiston yozgacha Eron va Urugvay bilan o'ynaydi. Yani bu jamoalar ham ayni paytda bizdan kuchli va reytingda yuqorida turgan jamoalar hisoblanadi.
Buning yana bir salbiy tomoni bor. Senegal bilan ham, Marokash bilan ham O'zbekiston ikkinchi raqam ostida o'ynaydi. Sababi raqiblar kuchli va biz pressing ostida o'ynaymiz. Osiyo Kubogiga mana shunday kuchli raqiblar bilan o'ynayverib tayyorgarlik ko'rsak ertaga qita chempionatida o'zimizdan kuchsiz bo'lgan jamoa bilan to'qnash kelsak qanday o'ynashni bilmay qolishimiz mumkin. Yani birinchi raqam ostida o'ynab tayyorgarlik ko'rmaganimizdan keyin hujum qilib gol urishga qiynalamiz. SHunday ekan, O'zbekiston terma jamoasi bazida reytingda o'zidan pastda turgan jamoalar bilan ham o'rtoqlik uchrashuvlarini o'tkazib turishi foydali.
Bugun bo'lib o'tadigan Marokash - O'zbekiston uchrashuvida vakillarimizga omad tilaymiz. Kuchli raqibni uning o'z maydonida mag'lub etishini kutamiz. SHunda hech qanday xavotir bo'lmaydi.
Narzulla Saydullaev
Bosh sahifaga
1820