Poytaxtdagi Jar stadionining zaxira maydonida amaldagi mamlakat chempioni “Metallurg” hamda 2017 yilgi Kubok finalchisi (sababi Kubokni ham “Metallurg” qo'lga kiritgan) “Bunyodkor” jamoalari o'zaro kuch sinashishdi.
Har ikkala jamoa ham g'alabaga bo'lgan shijoatini, ishtiyoqini namoyon etishdi. Birinchi bo'limning dastlabki daqiqalarida “Bunyodkor” qizlarining tashabbuskorligi sezilib turdi. Ketma-ket uyushtirilgan hujumlar esa samarasiz yakunlanaverdi. “Metallurg” ham qarshi hujumlarda faollik ko'rsatishdi. Bu ko'p o'tmay samarasini berdi. Qizig'i, “Bunyodkor” jamoasi darvozasiga kiritilgan dastlabki golda poytaxtliklarning o'zlari raqiblariga “yordamlashishdi” – Luiza Sadirova burchakdan oshirilgan to'pni maydon tashqarisiga chiqarish o'rniga o'z darvozasi to'riga yo'llab qo'ya qoldi. O'n daqiqa o'tar-o'tmay Luizaning xatosini jamoadoshi Lyudmila Karachik tuzatdi – darvozabon bilan birga-bir chiqqan holda darvozani ishg'ol etishning uddasidan chiqdi – 1:1.
Tomoshabinlar ikkinchi bo'limda ham qiziqarli o'yin guvohi bo'lishdi. Har ikkala tomondan bir necha bor hujumlar uyushtiroldi, xavfli vaziyatlar yaratildi. Biroq darvoza bir bor ishg'ol etildi. O'yinning 70-daqiqasida Nozimaxon Ergasheva “Bunyodkor” darvozasiga gol kiritib, muhim g'alabani taminladi.
SHu tariqa “Metallurg” ikkinchi bor Superkubokni qo'lga kiritib, bu borada etakchi hisoblangan “Sevinch” bilan ko'rsatkichlarini tenglashtirib oldi.
O'zbekiston Superkubogi.
“Bunyodkor” - “Metallurg” –– 1:2 (1:1).
28 mart. Toshkent shahri. Jar stadioni. 85 tomoshabin.
Hakamlar: Edita Mirobidova (Toshkent), Zilola Raxmatova (Qarshi), Kristina Sereda (Toshkent), Anna Sidorova (Toshkent).
“Bunyodkor”: Olga Qahhorova, Dilnoza Bektemirova, Saida Galimova, Marina Kosnikova, Umida Zoirova, Mariya Moiseeva (Ekaterina Salnokova, 65), Solixa Husniddinova, Rushaniya Safina, Luiza Sadirova, Tojiniso Rashidova (Ozoda Xojieva, 77), Lyudmila Karachik.
“Metallurg”: Gulandon Boymatova, Zumradxon Nazarova, Xolida Dadaboeva, Nozima Kamoltoeva, Iroda Turdalieva, Feruza Turdalieva, Maxliyo Sariqova, Diyora Erkinova (Jesika Kruchinina, 64), Mavluda Minavvarova, Dildora Nozimova, Nozimaxon Ergasheva.
Gollar: L.Karachik (41) – L.Sadirova (33-o'z darv.), N.Ergasheva (70).
Ogohlantirish: D.Bektemirova (58) – Z.Nazarova (6), M.Minavvarova (27).
Nazoratchi – Ro'zim Davlatmurodov (Toshkent).
Bosh sahifaga
1661