Ushbu turda Toshkentning “Bunyodkor” jamoasi o'z uyida Buxoroning “Buxoro” klubini qabul qilsa, Qarshida “Nasaf” Bekobodning “Metallurg” jamoasi bilan bahs olib boradi. Ushbu uchrashuvlar oldidan jamoalarning imkoniyatlarini hisoblab chiqamiz.
"Bunyodkor" - "Buxoro"
Toshkentning “Bunyodkor” jamoasi Farg'onada “Neftchi” mehmoni bo'ldi va Xurshid G'iyosovning yagona goli evaziga safardan 3 ochko bilan ortga qaytdi. Bu yilgi superliga bahslari barcha jamoalar uchun qiyin kechmoqda. O'yinlarda kutilmagan natijalar qayd etilmoqda. Buxoroning “Buxoro” jamoasi ham Toshkentga shunchaki o'yin o'tkazish uchun tashrif buyurmaydi. “Buxoro” poytaxtdan kamida durang bilan uyga qaytishni maqsad qilgan bo'lsa ajabmas. SHuning uchun ham bugungi bahsda “Bunyodkor” jamoasiga oson bo'lmasligi aniq. O'tgan turda buxoroliklar o'z uyida Jizzaxning “So'g'diyona” jamoasini qabul qilib yirik hisobda g'alaba qozongandi.Ushbu g'alaba shukuhi ularga bugungi uchrashuvda biroz bo'lsada kuch berishi tabiiy. “Bunyodkor” – “Buxoro” jamoalari o'zaro yigirma marotaba to'qnash kelishgan. SHulardan 16 uchrashuvda “Bunyodkor” g'alaba qozongan bo'lsa bir marotaba “Buxoro” jamoasining qo'li baland kelgan. 3 marotaba tomonlar murosa yo'lini tanlashgan. “Bunyodkor” o'z uyida “Buxoro” jamoasiga qarshi 10ta uchrashuvning barchasida g'alaba qozongan. “Buxoro” Toshkentdagi o'yinda biror marotaba ham “qaldirg'ochlar” darvozasini ishg'ol qila olmagan. Bugungi bahsda “Bunyodkor” jamoasining imkoniyatlari “Buxoro”ga qaraganda nisbatan ko'proq.
Imkoniyat: 40/30/30
“Nasaf” – “Metallurg”
Ushbu turda Qarshining “Nasaf” jamoasi o'z uyida Bekobodning “Metallurg” jamoasini qabul qiladi. “Ajdarlar” musobaqa jadvalida “Navbahor” bilan bir xil 7 ochko jamg'argan holda karvonboshilik qilmoqda. Bekobodliklar eka “Nasaf”dan 2 ochko ortda bormoqda. Agarda bugungi bahsda “Metallurg” g'alaba qozonadigan bo'lsa hozirgi holatini yaxshilab olishi mumkin. Aksincha bo'ladigan bo'lsa “Metallurg” quyi pog'onaga tushib ketishi mumkin. SHuning uchun ham bugun bekobodliklar Qarshida kuchli raqibga qarshi munosib o'yin ko'rsatishga to'g'ri keladi. “Nasaf” jamoasi musobaqa jadvalida o'z o'rnini saqlab qolish uchun kurash olib boradi. Ushbu jamoalar o'zaro 40 marotaba to'qnash kelishgan. 26 o'yinda qarshiliklar g'alaba qozongan bo'lsa, to'rtta o'yinda durang natija qayd etilgan. Qolgan 10 uchrashuvda “Metallurg” g'olib bo'lgan. Bundan avvalgi turda “Nasaf” safarda “Qizilqum” jamoasini 2:1 hisobida mag'lub etishga erishgandi. “Metallurg” esa o'z uyida “Qo'qon-1912” jamoasini qabul qilib, Suhrob Nurulloevning kiritgan yagona goli evaziga g'alabani tantana qilgan. Bugungi o'yinda “Nasaf” jamoasining imkoniyatlari raqiblariga qaraganda biroz ko'proq. “Nasaf” o'zaro o'yinda o'z uyida “Metallurg”ga bir marotaba mag'lubiyatga uchragan.
Imkoniyat: 40/30/30
Bosh sahifaga
1855