Bilasizmi? Superligada gol urmagan faqat "Neftchi" qoldi

"Qo'qon-1912" o'z maydonida "Navbahor"ni qabul qilsa, amaldagi chempion "Lokomotiv" Olmaliqda AGMK mehmoni bo'ladi. Yana bir uchrashuv Toshkentda "Paxtakor" va "Neftchi" jamoalari o'rtasida kechadi.

4-tur bahslari davom etayotgan bir paytda Superligada gol urmagan birgina jamoa "Neftchi" qoldi. Farg'onaliklarda to'plar nisbati 0-1 bo'lib turibdi. "Neftchi" bungacha o'z maydonida "Nasaf", safarda "So'g'diyona" bilan 0:0 o'ynadi. "Bunyodkor" bilan kechgan bahsda esa 0:1 hisobida yutqazib qo'ydi.

Bugun Farg'ona shahrining bosh jamoasi Toshkentda "Paxtakor" mehmoni bo'ladi. Bir paytlar mazkur jamoalar o'rtasidagi to'ynashuvlar  "o'zbek klasikosi" deb yuritilardi. Ammo oxirgi yillarga kelib ayniqsa "Neftchi" o'z mavqeini boy berishi natijasida "klasiko"dan asar ham qolmadi.

"Neftchi" bugun golsiz seriyasiga barham bera oladimi-yo'qmi, buni "Paxtakor" stadionida kechadigan bellashuv davomida bilib olamiz. O'yin 20:00da boshlanadi. Hozircha Superligada eng ko'p to'p kiritgan jamoalar "Bunyodkor" va "Nasaf" va "Buxoro" bo'lib turishibdi. Har uchala klub hisobida 6tadan gol bor.