Qarshida "Nasaf" Eronning "Persepolis" klubi bilan 0:0 hisobida durang o'ynadi. "Lokomotiv" esa kecha BAAda "Al Vahda"ni tor-mor etib qaytdi.
So'nggi tur oldidan klublarimizning imkoniyatlari haqida to'xtalib o'tamiz.
Afsuski o'z uyida g'alaba qozona olmagan "Nasaf"ning guruhda qolib ketishi aniq bo'ldi. Ro'ziqul Berdiev shogirdlari hisobida ayni paytda 7 ochko bor. So'nggi turda jamoamiz "Al Vasl"ni har qanday hisobda mag'lub etsa ham keyingi bosqchiga chiqa olmaydi. Sababi "Nasaf" g'alaba qozonsa va Eron klubi oxirgi turda "Al Sadd"ga yutqazsa "Persepolis"ga etib oladi.
Osiyo chempionlar ligasi reglamentiga ko'ra ochkolar teng kelib qolganda birinchi navbatda o'zaro o'yinlarga etibor qilinadi. "Nasaf" "Persepolis"ga safarda yutqazgan (0:3) va o'z maydonida durang o'ynadi (0:0). SHu sababli "ajdarlar" uchun 6-tur uchrashuvi rasmiyatchilikka aylandi. Lekin bu bilan "Nasaf"ga natija muhim emas deyish noo'rin. Sababi klub O'zbekiston sharafini himoya qilmoqda va har qanday ochko navbatdagi yillar uchun yurtimiz klublariga kvota ajratishiga tasir qiladi. Bundan tashqari jamoa o'z muxlislari uchun ham g'alaba qozonishi kerak. SHunday ekan "Nasaf"dan so'nggi turda ham g'alaba kutamiz.
"Lokomotiv" esa ajoyib g'alabadan so'ng keyingi bosqichga chiqish imkoniyatni yaxshilab oldi. Bunda Qatarning "Al Duhail" klubi ham "Loko"ga "yordam" berib yubordi. Sababi o'tgan turdayoq keyingi bosqichga chiqib bo'lgan "Al Duhail" kecha Eronda "Zob Ohan"ni mag'lub etdi.
SHu tariqa, oxirgi turdan oldin "Lokomotiv" va "Zob Ohan" hisobida bir xil 6tadan ochko bor. Bu degani "Lokomotiv" 17 aprel kuni o'z maydonida "Zob Ohan"ni istalgan hisob bilan mag'lub etsa keyingi bosqichga chiqadi. Durang esa Eron klubini qoniqtiradi.
Qizig'i, "Nasaf" 10 ochko bilan ham guruhdan chiqa olmaydi, "Lokomotiv"ga esa 9 ochko guruhdan chiqishi uchun etarli bo'ladi.
Oxirgi turda O'zbekistonning ikkala klubiga omad tilaymiz.
Bosh sahifaga
1881