Eron O'zbekiston bilan o'yinni 19 mayga belgiladi

Dastlab Eron may oyida ikkita o'rtoqlik uchrashuvi o'tkazishni belgilab qo'ygandi. Ammo 11 may kuni bo'lib o'tishi ko'zda tutilgan Eron - Suriya bahsi bekor qilindi. Bunga sabab termaga nomzod ko'plab futbolchilarning Osiyo chempionlar ligasida muvaffaqiyatli ishtirok etayotgani.

Eron futbol saytlarining yozishicha, endi o'yin faqat O'zbekiston bilan bo'ladi va mazkur uchrashuv 19 may kuni Tehrondagi "Ozodi" stadionida o'tkaziladi. Qizig'i shundaki, yangi chiqarilgan Superliga taqvimida Eron - O'zbekiston bahsi 17 may deb yozilgan. Ammo eronliklar o'yin 19 may kuni bo'ladi deb yozmoqda.

Agar mazkur o'rtoqlik uchrashuvi rostan ham 19 may kuni o'tkaziladigan bo'lsa, unda Superliga taqvimida yana o'zgarish yuzaga kelishi mumkin. CHunki bizda 20-21-22 may kunlari Superligada 12-tur uchrashuvlari qo'yilgan.