Polshalik to'purar Levandovski haqida odamlar nima deydi?

Polsha terma jamoasi ham bu yilgi mundialdan ko'p narsa kutyapti. JCH-2018 saralash bahslarini muvaffaqiyatli o'tkazgan Polsha o'z guruhida Senegal, Yaponiya va Kolumbiyaga qarshi bahs olib boradi. Jamoa hujumchisi Robert Levandovski saralash o'yinlarida evropalik futbolchilar orasida eng ko'p gol urgan hujumchi bo'ldi. U 16ta goli bilan bu borada portugaliyalik Ronalduni ortda qoldirdi.

Statistika bo'yicha JCH saralash o'yinlarida Polsha kiritgan gollarning 64 foizi aynan Levandovskiga tegishli bo'ldi. SHu bois ham polshaliklar ustozi Adam Navalka "Bavariya" hujumchisini jamoa uchun o'ta muhim hujumchi deb atadi. Xo'sh, Robert qanday saviyadagi futbolchi? U shunchalik kuchlimi? FIFA rasmi sayti bu haqda bir nechta kishiga murojaat qildi.

- "Men har doim uni o'ziga xos hujumchi deb ataganman. U xuddi Zlatan Ibragimovichga o'xshaydi. CHunki ikkalasi ham yo'q joydan gol uradi. Levandovski ruhan kuchli o'yinchi. U to'pni sheriklaridan qizg'anmaydi. U buyuk futbolchi". (Leo Beenxaker, Levandovskini terma jamoada ilk bor o'ynatgan murabbiy)

- "Unda hujumchiga kerakli barcha xislatlar mavjud. U jismonan kuchli, hujumlarni gol bilan yakunlay oladi. U shuningdek, yarim himoyada ham o'ynay oladi. U maydon markazidayoq to'pni qabul qilib chiroyli hujum boshlashi mumkin. To'p uning o'rtog'i". (Yurgen Klopp, Levandovskini "Borussiya D"ga olib kelgan murabbiy)

- "U men ko'rgan hujumchilar orasida eng professionali. U uxlayotganida ham tushida futbolni ko'radi. SHuningdek, 24 soat ishlashdan qochmaydi. U har doim hujumning eng qaynoq nuqtasida bo'ladi". (Pep Gvardiola, Levandovskining "Bavariya"dagi sobiq ustozi)

- "U jahondagi eng kuchli hujumchi. Robert har doim rivojlanib boradi. Uni to'xtatib qolish imkonsiz. U shubhasiz jamoamizning yuragi". (Adam Navalka, Polsha terma jamoasi bosh murabbiyi)

- "U har qanday holatda to'p kirita oladi. Bu uning eng katta ustun tomoni". (Yupp Xaynkess, "Bavariya" bosh murabbiyi)

- "U nafaqat hujumda o'ynab gol uradi, balki jamoaviy harakatlarda ham ajralib turadi. Robert "qo'rqinchli" hujumchi va u bilan o'ynash maroqli". (Aren Robben, "Bavariya"dagi jamoadoshi)

- "Levandovski men uchun eng yaxshi o'rnak. Men u maydonga tushgan bahslarni muntazam kuzatib boraman. Hujumchi sifatida undan ko'p narsa o'rganganman". (Alvaro Morata, "CHelsi" hujumchisi)

- "Levandovski 9-raqamli futbolchilar orasida eng kuchlisi. U tezkor. Unda texnika va harakat baland. Bosh bilan o'ynashi ham zo'r. U ikkala oyoqda ham to'p kirita oladi. U jarima maydonchasi ichida to'pni kutib o'tirmaydi, balki o'zi harakat qiladi. U har mavsum 25-30ta gol uradi". (Lotar Matteus, sobiq futbolchi)

- "Robert Levandovski afsonaviy Gerd Myuller bilan bir xil darajada". (Karl-Xaync Rummenigge, "Bavariya" klubi kengashi raisi)

- "Unda hujumchiga zarur bo'lgan barcha sifatlar mavjud". (Jovanni Elber, "Bavariya" sobiq hujumchisi)