Urganchda mahalliy “Xorazm” jamoasi Nukusning “Orol” klubini qabul qildi. Unda maydon egalari 4:1 hisobida g'alaba qozondi. Mazkur o'yinning boshlanish vaqti aslida soat 17:00ga belgilangan edi. Ammo bahs soat 18:00da boshlandi. Xo'sh, bunga nima sabab bo'ldi? Uchrashuvdan so'ng “Xorazm” ustozi Aleksandr Ejov bilan suhbatlashganimizda, shu haqda ham so'radik.
- Avvalo chempionatning o'z maydonimizdagi ilk uchrashuvini g'alaba bilan boshlaganimizdan xursandman va bu bilan jamoamiz ishqibozlarini tabriklayman. Albatta, har bir jamoa uchrashuvdan oldin maydonga faqat g'alaba qozonish maqsadida chiqadi. “Orol”ga qarshi o'tgan o'yinimizda ham shogirdlarim o'z muxlislarimiz qarshisida o'ynayotganimizni xis etib, uch ochko jamg'arish ilinjida xarakat qildi. Yakunda o'z niyatimizga etdik. O'yindan ko'nglim to'ldi.
- Garchi yirik hisobda g'alaba qozongan bo'lsakda, uchrashuv jamoamiz uchun oson o'tmadi. Qiziqarli va jangavor tarzda o'tgan bellashuvda omad bizga kulib boqdi. Albatta, kamchiliklar ham yo'q emas. Ayrim sabablarga ko'ra, qishki yig'inlarni yuqori saviyada o'tkaza olmaganimiz rasmiy o'yinlar chog'ida o'z so'zini aytmoqda. Yani yigitlarning jismoniy xolati ko'ngildagidek emas. Endilikda imkon qadar bu kabi kamchiliklar ustida ishlab, ularni bartaraf etishga urinamiz.
- “Orol”ga qarshi o'yinimiz deyarli 1,5 soatdan keyin boshlandi. Bunga sabab esa maydondagi darvozalarning standart xolatda emasligidir. Qisqa fursat ichida muammo bartaraf etilib, biroz kechikib bo'lsa ham o'yinni o'tkazib oldik. Meni xursand qilgan jihati, o'yinning kech boshlangani huddi Evropa maydonlaridagi o'yinlarga o'xshashib ketdi. Stadion yoritgichlari talab darajasida va bu tomondan hech qanday muammo bo'lmaganini aytib o'tishim kerak.
Islombek Rustambekov yozib oldi
Bosh sahifaga
146