Samarqandlik futbol muxlislarining O'FF prezidentiga murojaati

O'zbekiston Futbol
Federaciyasi prezidenti, senator
Usmonov Mirabror Zufarovichga
Samarqandning Dinamo jamoasi
bir guruh muxlislari nomidan

                                              MUROJAAT


Assalomu alaykum, hurmatli Mirabror Zufarovich!

Avvalo, so'nggi yillarda hurmatli prezidentimiz Islom Abdug'anievich Karimov rahnamoligida mamlakatimiz erishib kelayotgan yutuqlar qatorida siz boshchiligidagi sportimiz, xususan milliy futbolimiz ham qo'lga kiritayotgan yangidan-yangi g'alaba va marralarni egallayotgan futbolchilarimizni ko'rib behad quvonayotganligimizni va bunday samarali ishlar uchun shaxsan sizga bo'lgan hurmatimiz yanada oshayotganligini aytishga ruxsat bergaysiz. Zero, bundan to'qqiz yil avval mamlakatimiz rahbari sizga masuliyatli vazifa – Millionlar o'yini bo'lmish futbolning yurtimizdagi rivojiga masul etib tayinlagach, shu kungacha futbolimizni qay daraja yuqori saviyaga olib chiqa olganligingizni, qator ulkan g'alabalar ko'rsatib turibdiki, buning zamirida qanchalik mehnatlar yotganligini juda yaxshi tushunamiz va bu borada sizni doimo qo'llab-quvvatlaymiz. Ayniqsa, hozirda hukumatimiz tomonidan futbolga siyosat darajasida juda katta etibor berilayotganligini, prezidentimiz tomonidan elon qilinayotgan futbol rivoji yo'lidagi qator qarorlar misolida ham ko'rib turibmiz. Bu albatta, ayniqsa etishib chiqayotgan yosh avlod futbolchilarining - bolalar, o'smirlar va yoshlar futbolidagi qator jahon darajasidagi g'alabalarimizni taminlab, ifoda etib turibdi. O'zbekiston terma jamoalarining ham qo'lga kiritayotgan ajoyib g'alabalari butun mamlakatimiz futbol ixlosmandlari qatorida, samarqandlik millionlab muxlislarning quvonchiga sabab bo'lmoqda.

Albatta, mamlakatimiz jamoalarining xalqaro maydonlarda erishayotgan natijalari kishini xursand etib, xalqning kayfiyatini ko'tarayotgan bir pallada, viloyatimizning bosh jamoasi Dinamoning so'nggi yillardagi natijalari kishi dilini xira qilmoqda. Ayniqsa, joriy yilgi mavsum yakunida jamoa muvaffaqiyatsizlikka uchrab, Oliy Ligani tark etgach, biz kabi samarqandlik minglab futbol ishqibozlari karaxt ahvolga tushishdi. Xususan, Olmaliq bilan kechgan uchrashuvning 90+3-daqiqasida mehmonlar tomonidan kiritilgan gol Dinamo muxlislari yuziga tushirilgan tarsaki misoli tasir qilgani aniq. Ushbu o'yin yakuniga etgach, muxlis dilida nimalar kechganligini ishqibozning o'zi bildi, xolos. Muxlislar dardi esa sizga begona emas.

Samarqandning bosh jamoasiga viloyatimiz hokimi Zoyir Toirovich Mirzaev rahbarligida etibor kuchaytirilgan bo'lsada, afsuski jamoa murabbiylari va azolari klubni Oliy Ligada olib qola bilishmadi. Natijada esa klub Birinchi Ligaga ravona bo'lish arafasida turibdi. Bunday holat esa hech bir samarqandlik muxlisni qoniqtirmaydi.

Axir, Oliy Ligada muxlis to'plash borasida etakchi o'rinlarda turadigan samarqandlik ishqibozlar, har qanday holatda ham, xoh Dinamo uyda o'ynasin, xoh safar uchrashuvida bo'lsin o'z jamoalarini qo'llab-quvvatlashdan to'xtashmadi. Samarqanddek butun dunyo tan olgan qadimiy va hamisha navqiron shaharning bosh jamoasi O'zbekiston Oliy Ligasida emas, quyi ligasida to'p surib yurishi hech qanday mantiqqa to'g'ri kelmaydi. O'zbekiston dovrug'ini yoyishda katta o'rin tutadigan afsonaviy shahar jamoasi Oliy Ligada bo'lmasligi achinarli holatdir. Axir, O'zbekistonning ikkinchi poytaxti maqomidagi shaharning katta futboldan bahramand bo'lmasligi achinarli emasmi?

Hurmatli Mirabror Zufarovich, samarqandlik minglab muxlislar nomidan sevimli jamoamiz, 4 million aholiga ega Samarqand viloyatining yagona va bosh jamoasi Dinamo klubini Oliy Ligada olib qolishda amaliy yordam berishingizni so'raymiz. O'zbek futbolida o'z o'rniga ega bo'lgan Samarqand futbolining bosh jamoasi bu yil 55 yilligini nishonladi. Ammo viloyat futbolining bugungi kuni juda g'amgin holatda Viloyatimiz bosh jamoasining ligadan tushib ketishi, bugungi kunda jadal rivojlanishda bo'lgan bolalar, o'smirlar va yoshlar futbolining ham taraqqiy etishiga jiddiy to'sqinlik qilishi mumkin. Umuman, mamlakatimizning ijtimoiy-siyosiy hayotidagi etakchi viloyatlardan biri sanalmish Samarqandning bir yil katta futboldan chetda qolishi viloyat futbolining ortga qadam qo'yishiga barobardir. SHunday ekan, bugungi kunda Samarqand futboli sizning yordamingizga va etiboringizga har qachongidanda ham muhtoj. SHu bois sizdan iltimos qilib so'rab qolardikki, Samarqandga tashrif buyurib, viloyat futboli bilan tanishsangiz va kerakli chora-tadbirlarni belgilasangiz sizdan minnatdor bo'lardik.

Muhtaram prezidentimiz Islom Abdug'anievich Karimov o'zlari tug'ilib o'sgan Samarqanddda har safar bo'lganlarida, yurtimiz erishayotgan yutuqlar, taraqqiyoti yo'lida viloyatimizning hissasi ulkan ekanligini takidlaydilar. Bilaks, biz ham Samarqand futboli mamlakatimiz futbolida yuqori o'rinlarda bo'lishini istaymiz va bu yo'lda sizdan amaliy yordam kutib qolamiz.

Sizga cheksiz hurmat va ehtirom bilan, samarqandlik futbol muxlislari.

(Muxlislar ism-sharifi va imzosi ilova qilingan)