Yig'in doirasida O'zbekisiton OTJ “Lokomotiv” klubi o'rinbosarlariga qarshi bitta nazorat uchrashuvi o'tkazib, 3:1 hisobida g'alaba qozondi.
Olimpiya terma jamoasi bosh murabbiyi Ravshan Haydarov mazkur yig'ini foydali va samarali bo'lganini aytib o'tdi.
“Toshkentdagi yig'inga 1997 yil va undan keyin tavallud topgan futbolchilarni jalb qildik. Asosiy maqsad O'zbekiston olimpiya terma jamoasiga yangi nomzodlarni saralab olish. Xitoydagi Osiyo chempionatida g'alaba qozongan futbolchilarning imkoniyatlarini yaxshi bilganimiz uchun ularni ushbu yig'inga jalb qilmadik.
Oldimizga 2020 yil Tokioda bo'ladigan Olimpiadaga yo'llanmani qo'lga kiritish vazifasi qo'yilgan. Mazkur vazifani uddalash uchun ko'p mehnat qilishimiz zarur. O'z o'rnida bizga mana shunday yig'inlar tashkilib qilib, barcha sharoitlarni yaratib berayotgan O'zbekiston futbol associaciyasi rahbariyatiga o'z minnatdorchiligimni bildirib o'tmoqchiman.
Bunday yig'inlar juda foydali va samarali. Yig'inga nafaqat Superliga, balki Pro-liga jamoalaridan ham futbolchilar jalb qildik. O'quv-mashg'ulotlari davomida o'zimiz uchun yangi futbolchilarni kashf qildik. Pro-ligada ham ajoyib futbolchilar bor. Hozirdan shuni aytishim mumkinki, Pro-ligada to'p surayotgan bir-ikki nafar futbolchida asosiy tarkibga kirish uchun yaxshigina imkoniyat bor.
Yangi futbolchilar qancha ko'p bo'lsa, raqobat kuchayadi. Bu esa barcha futbolchilarga o'z ustilarida tinmay ishlab borish uchun motivaciya beradi.
Futbolchilarning jismoniy holatini sinovdan o'tkazish maqsadida, O'FA Ilmiy-texnik guruhi xodimlari bilan hamkorlikda test-sinovlari o'tkazdik. Testlar natijalarini qoniqarli deb aytish mumkin. Olimpiya terma jamoasi uchun nomzod futbolchilar uchun maxsus jismoniy yuklamalar ishlab chiqildi va ular to'p surayotgan jamoalar murabbiylariga taqdim qilindi. Biz terma jamoaga nomzod futbolchilarning jismoniy holatini doimo nazorat qilib boramiz.
Yig'in davomida “Lokomotiv” o'rinbosarlariga uchrashuv o'tkazildi. O'yin davomida futbolchilarning maydonda fikrlash qobiliyati, texnik-taktik imkoniyatlarin ko'zdan kechirdik, kamchiliklarni tahlil qilib, tegishli ko'rsatmalar berdik.
Bunday yig'inlar yil davomida yana o'tkaziladi. Olimpiya terma jamoasi shu tarzda shakllantirib boriladi. 2020 yil Tokioda bo'ladigan Olimpiadaga yo'llanmani qo'lga kiritib, xalqimiz, muxlislarimiz oldida yuzimiz yorug' bo'ladi, degan umiddamiz”, - deydi Ravshan Haydarov.
Bosh sahifaga
1375