O'tgan yozda PSJ moliyaviy feyr-pleyning ustidan kuldi va Kilian Mbappeni "Monako"dan 180 mln evroga sotib olish sharti bilan ijaraga oldi. "France Football" nashri xabariga ko'ra, FIFA futbolchilarni ijaraga berishni taqiqlamoqchi. Ammo bunday qilish kerak emas. Bu ko'p holatlarda futbolchilarning foydasiga ishlaydi.
FERNANDO MORENTES
Ijaraga berilgan mavsum: 2003/04
Jamoa: "Real"dan "Monako"ga
Ispaniyalik futbolchi "Real" bilan uch bora Evropa chempionlar ligasi g'olibi bo'ldi. Ikki marta milliy chempionatda bosh sovrinni qo'lga kiritdi. Biroq u o'z jamoasida rivojlana olmadi. Ronaldoning transferidan keyin Fernandoning o'yin amaliyoti pasayib ketdi. SHu boisdan jamoa rahbariyati 27 yoshli futbolchini "Monako"ga ijaraga berdi.
Madrid jamoasidagilar keyinchalik bunga afsuslangan bo'lsalar kerak. Oradan 7 oy vaqt o'tib, ECHL chorak finalida u Iker Kasilyas darvozasini ikki bora ishg'ol etdi va o'z jamoasini turnirdan chiqarib yubordi. "Monako" finalgacha etib bordi va bahsda "Portu"ga (0:3) mag'lub bo'ldi. Ispaniyalik futbolchi esa "Oltin butsa"ni qabul qilib oldi. Bunga u o'z mehnatlari bilan erishgandi.
TIBO KURTUA
Ijaraga berilgan mavsum: 2011/12, 2012/13, 2013/14
Jamoa: "CHelsi"dan "Atletiko"ga
"CHelsi" har doim o'z tarbiyalanuvchilariga katta ahamiyat berib keladi. Yoshlarni shakllantiradi va Evropaning boshqa jamoalariga ijaraga beradi. Ular o'sha klublarda katta tajriba to'plashadi. Bir vaqtlar darvozabon Matey Delach 7 oy o'ziga beriladigan imkoniyatni kutgandi.
Biroq undan-da yaxshiroq darvozabon ham bor. Tibo Kurtua "Atletiko" safida o'ynadi va "CHelsi"ga qaytganidan keyin Petr CHexning joyini egalladi. Tibo uch yilda Ispaniyada to'rtta sovrin qo'lga kiritdi. Evropa ligasi g'olibi bo'ldi va ECHLda kumush medallarga ega chiqdi. Besh mavsum davomida u "CHelsi"da 3 sovringa ega chiqqandi.
2013/14 yilgi mavsum ECHLda Tibo "Atletiko" bilan birgalikda turnirning finaligacha bordi. Qizig'i, u ham yarim finalda o'z jamoasi "CHelsi"ning tor-mor etilishida katta hissa qo'shdi.
KEVIN DE BRYUYNE
Ijaraga berilgan mavsum: 2012/13
Jamoa: "CHelsi"dan "Verder"ga
Bremenda u o'zining eng yaxshi davrini boshladi. Kevin unchalik kuchli bo'lmagan "Verder"ning asosiy futbolchisiga aylandi va Bundesliganing eng yaxshi assistentlaridan biri bo'ldi. Biroq Joze Mourino uni "CHelsi"ga kerak emas deb hisobladi. 2013/14 yilgi mavsumning dastlabki qismida u "CHelsi" tarkibida 3 o'yinda qatnashdi. 2014 yilning qishida uni Dortmundning "Borussiya"si va "Bayer"ga ijaraga berishga taklif qilishdi. Biroq bunga rad javobi berilganidan keyin Kevin "Volfsburg"ga 21,5 mln evroga transfer qilindi.
Ayni damda u "Manchester Siti"ning asosiy futbolchisi. Kevin jamoasining Angliya chempioni bo'lishida katta hissa qo'shdi.
ROMELU LUKAKU
Ijaraga berilgan mavsum: 2012/13, 2013/14
Jamoa: "CHelsi"dan "Vest Bromvich" va "Everton"ga
2012 yilning bahorida "CHelsi" ECHL g'olibligini qo'lga kiritdi. Lukaku bu turnirning birorta bahsida maydonga tushmadi. Avtobusda Solomon Kalu ECHL sovrinini 19 yoshli futbolchining tizzasiga qo'yganida u shunday degan ekan: "Olib tashlang, bu sovrinning menga hech qanday ahamiyati yo'q".
Keyingi mavsumda u "Vest Bromvich"ga ijaraga berildi. Natijalar yaxshi: APLda 17 gol, shuningdek, Aleks Fergyusonning xayrlashuv uchrashuvida xet-trik. Vaqt o'tib u yana "CHelsi"ga qaytdi, biroq yana gollar kirita olmadi. Oqibatda "Everton"ga ijaraga berildi. U erda Romelu yaxshi to'purarligini isbotladi.
MUHAMMAD SALOH
Ijaraga berilgan mavsum: 2014/15 (ikkinchi qismda), 2015/16
Jamoa: "CHelsi"dan "Fiorentina" va "Roma"ga
Bugungi Muhammad Saloh - Italiya futbolining kashfiyoti. Joze Mourino shunday hisoblaydi, chunki u "CHelsi"da ochilib ketmagan: "U Italiyada rivojlandi, jismoniy jihatdan ancha kuchli bo'ldi", - degandi Joze.
Apenninda Saloh boshqatdan tug'ildi. U erda zaxirada o'tirmadi. "Fiorentina"da u 26 uchrashuvda qatnashdi va 9 gol kiritdi. "Roma"da esa undan-da kuchliroq o'ynadi: yilning eng yaxshi futbolchisi va to'purari. Rimliklar futbolchini "Liverpul"ga yaxshigina tayyorlab bera olishdi.
XAMES RODRIGES
Ijaraga berilgan mavsum: 2017/18
Jamoa: "Real"dan "Bavariya"ga
Kolumbiyalik pleymeykerning iqtidori yuqori. U zaxirada o'tirishga loyiq emas. JCH-2014da yaxshi o'yin namoyish etgan futbolchi Zidan bilan kelisha olmadi, endi Xaynkes bilan baxtiyor bo'lib ishlamoqda. Ayni damda u Bundesligada assistentlar bo'yicha 3-o'rinda bo'lib turibdi.
"Madridda u qanday darajadaligini ko'rsatish uchun etarlicha imkoniyat bo'lmadi. Biroq Myunxenda u baxtiyor yashamoqda. Bu erda yangi bo'lsa ham, Germaniyaning madaniyati, tili va yashash tarziga ko'nikib ketdi", - dedi Xaynkes.
Endi u ham ECHL yarim finalida o'z jamoasi - "Real"ga qarshi uchrashuvda maydonga tushishi kutilmoqda.
MISHI BATSHUAYI
Ijaraga berilgan mavsum: 2017/18 (ikkinchi qism)
Jamoa: "CHelsi"dan "Borussiya" Dortmundga
"Borussiya"da har doim gol uradigan futbolchilar bo'lgan: Lukas Barrios, Robert Levandovski va Per-Emerik Obameyang fanatlarga ko'plab gollar urishini isbotlab bo'lgandi. Mishi ham odatni buzmayapti: 13 uchrashuvda 9 gol.
Mishi bir necha oydayoq "CHelsi"ga kerakli futbolchi ekanligini isbotladi. Jamoaga Morata kerak emas, Batshuayiga vaqt bering u isbotlaydi.
"Dortmundga o'zimni topish uchun keldim. Bir yarim yil davomida zaxirada o'tirdim. Hatto futzal ham o'ynadim. Endi esa haqiqiy Mishini ko'ryapman, bu juda yaxshi!". "Borussiya" futbolchini 60 mln evroga sotib olishi mumkin.
Mirjalol Normatov tarjimasi
Bosh sahifaga
1380