"Paxtakor" - "Qizilqum" uchrashuviga Andrey Kanchelskisning tashrif buyurgani haqida xabar bergandik. Ushbu tashrif doirasida u vice-prezident sifatida faoliyat olib borayotgan jamg'arma "Paxtakor" futbol klubi bilan hamkorlik memorandumini imzoladi. Unga klubimiz Prezidenti Bobur SHodiev va turli halokatlarda hayotdan ko'z yumgan futbolchilarning oilasiga yordam beruvchi "So'nmas yulduzlar" xayriya jamg'armasi prezidenti Yuriy Bocionov imzo chekishdi.
Unga ko'ra, kelajakda ushbu jamg'arma ko'magida "Paxtakor-79" jamoasi xotirasiga bag'ishlangan xayriya uchrashuvlari tashkil etiladi. "Paxtakor" futbol klubi jamoa va o'zbek futboli rivojlanishi yo'lida xizmat qilgan barcha insonlar mehnatini munosib qadrlaydi, ularni hurmat qiladi va yodga oladi. Xayriya uchrashuvlari katta ijtimoiy loyiha ekanini doimo anglaydi. Xayriya o'yinlari o'tkazish orqali o'sib kelayotgan yosh avlodda "Paxtakor"ning sobiq azolariga nisbatan g'urur hissini uyg'otish, ularni klub tarixidan xabardor etish maqsadlari ham ko'zlangan.
Ushbu jamg'arma turli halokatlar tufayli hayotdan ko'z yumgan sportchilar oilalariga moddiy ko'maklashish, turli mamlakatlarda ommaviy futbolni rivojlantirishga yordam berish, futbol akademiyalari ochish bilan shug'ullanadi. Rossiyada yaqinda Andrey Kanchelskis akademiyasi ishga tushirildi. Bunday akademiyani O'zbekistonda ham ochish mo'ljallanmoqda.
Ushbu hamkorlik natijasida "Paxtakor"ning 1979 yildagi aviahalokatiga bag'ishlab, joriy yil O'zbekistonning turli shaharlarida turnir o'tkazish mo'ljallangan. Unda jahonga mashhur klublarning 23 yoshgacha va faxriy tarkiblari ishtirok etishlari rejalashtirilmoqda. Turnirda ishtirok etishga rozilik bildirgan jamoalar nomi tez orada malum bo'ladi.
Bosh sahifaga
175