“Neftchi” o'z qarorgohida yig'inni boshladi. Tarkibda o'zgarishlar bor

Bosh murabbiy Andrey Fyodorovning ayni paytda Moskvada ekanligi bois, mashg'ulotlarni uning yordamchilari o'tkazmoqda. 

Hozircha yig'inda asosan mahalliy futbolchilar ishtirok etayotganini takidlash lozim. Bu yil jamoa sharafini himoya qilgan farg'onalik futbolchilar bilan birgalikda yoshlar jamoasida o'zini ko'rsatishga erishgan o'yinchilardir. SHu bilan birga tarkibda yangi nomlar ham yo'q emas. Xususan joriy mavsumni “Qo'qon-1912” tarkibida o'tkazgan Sardor Eminov va “SHo'rtan” himoyachisi Umar Eshmurodov bugungi kunda “Neftchi” mashg'ulotlarida ishtirok etmoqda. Aytish lozimki, ushbu ikki futbolchi ham bu yilgi chempionatda o'z jamoasi tarkibida eng ko'p o'yin o'tkazishgan. Eminov 29ta uchrashuv, Eshmurodov 28ta o'yinda maydonga tushgan. SHuningdek asli farg'onalik bo'lgan ammo so'nggi yillarni “SHo'rtan”da  o'tkazib kelayotgan iqtidorli futbolchilar – Jamshid Hoshimov bilan Husniddin G'ofurov ayni damda jamoa mashg'ulotlarida ishtirok etmoqda. Murabbiylar rejasiga ko'ra selekciya ishlari davom etadi. Klub bilan qaysi futbolchilarning rasman xayrlashgani esa yaqin orada malum qilinadi.