Vakillarimiz bugun musobaqadagi o'z ishtiroklarini KXDR terma jamoasiga qarshi o'yin bilan boshlashadi.
O'yindan oldin Olimpiya terma jamoamiz bosh murabbiyi Ravshan Haydarov matbuot anjumanida ishtirok etib, o'z fikrlarini bildirib o'tdi.
“Ushbu musobaqada ishtirok etayotganimizdan xursandman. Bu erdagi ko'pgina hamkasblarim bilan qishda Xitoyda o'tgan Osiyo chempionatida ko'rishgandik. Yana ko'rishish nasib etdi. O'ylaymanki, musobaqa tashkiliy jihatdan alo darajada o'tadi. Bunga ishonchim komil.
Indoneziyadagi mazkur Xalqaro turnir yozda bo'lib o'tadigan Osiyo o'yinlaridan oldin yangi futbolchilarni sinovdan o'tkazish uchun yaxshi imkoniyat taqdim qiladi. SHuningdek, Osiyo o'yinlariga tashrif buyurishdan avval bu musobaqa orqali biz Indoneziyadagi muhit, iqlim, sharoitlar haqida tasavvurga ega bo'lib olishimiz mumkin. SHu jihatdan olib qaraydigan bo'lsak, bu musobaqa barcha terma jamoalar uchun muhim deb o'ylayman”, - dedi Ravshan Haydarov.
Matbuot anjumaniga yig'ilgan jurnalistlar Ravshan Haydarovdan nima uchun Osiyo chempioni bo'lgan futbolchilarning barchasini ushbu musobaqaga olib kelmagani haqida so'rashdi.
“Mazkur musobaqa milliy chempionatimiz - Superliga o'yinlari bo'lib o'tayotgan paytga to'g'ri kelib qoldi. Osiyo chempioni bo'lgan aksar futbolchilar o'z klublarida asosiy futbolchi hisoblanishadi.
Qolaversa, biz ushbu musobaqada boshqa futbolchilarga ham o'zlarini ko'rsatish uchun imkon berish niyatidamiz”, - deb aytib o'tdi Ravshan Haydarov.
Bosh sahifaga
238