"Uchrashuvgacha raqiblarimiz haqida malumotlarga ega emasdim. 1-bo'lim davomida maydon egalarining o'yinlaridan kerakli xulosalarni chiqardim. Tanaffus paytida yigitlarga kerakli ko'rsatmalarni berdim. Futbolchilar o'z oldilariga qo'ygan vazifalarini ortig'i bilan bajara olishdi. SHogirdlarimning harakatlaridan to'liq qoniqish hosil qildim. Umuman olganda birinchi bo'limda biroz qiynaldik. Nega desangiz, taym davomida kuchli shamolga qarama-qarshi harakatlandik.
Hakamlik? Ularga hech qanday etirozimiz yo'q. Agarda imkoniyat berilganida ularga 5 baho qo'ygan bo'lardim. Hakamlar brigadasining maydonda borligi deyarli sezilmadi. Futbolchilar o'zlarini erkin tutishdi. Bilasizmi, men ham o'zim maydonda harakat qilayotgandek sezdim. Mana shunday hakamlik bo'lsa, Pro-liga saviyasi yanada o'sadi. Dilshod Karimov boshchiligidagi hakamlar brigadasiga o'z minnatdorligimni bildiraman.
Deyarli 1 soat yigitlar bir kishi kam bo'lib o'ynadi. Birinchi bo'lim oxirlarida bosh hakam jamoamiz sardori Murod To'ychiboevga qizil kartochka ko'rsatdi. SHunday bo'lsa-da, iroda ko'rsata oldik. Biz hakamga etiroz bildirmadik, referi haq edi.
Xabaringiz bor, o'zbek futbolidagi tajribali mutaxassislaridan biri Oleg Tyulkin jamoamizdagi faoliyatini boshladi. Bunday malakali murabbiyning biz bilan ish olib borishi jamoamizning kelgusi faoliyatiga ijobiy tasir o'tkazishi shubhasiz. Yoshi keksa muxlislar uning sobiq Ittifoq chempionatida to'p tepganini eslashadi. Demoqchimanki, Oleg Pavlovich bilan hamfikrlikda ishlayapmiz. U kishining maslahatlari bizga yo'l kelmoqda.
Fursatdan foydalanib, jamoamizga yordam berayotgan klub rahbariyatiga, Toshkent viloyati va Yuqorichirchiq tumani hokimligi mutasaddilariga o'z minnatdorligimni bildiraman. Kelgusida ham ularning ishonchini oqlashga intilamiz", - dedi Xolboev.
Nematjon Ahmedov suhbatlashdi
Bosh sahifaga
224
