Hech bo'lmasa finalda hakamlar xato qilmas yoxud Majich final uchun loyiqmi?

Unga ko'ra, "Real" - "Liverpul" uchrashuvini serbiyalik Milorad Majich boshchiligidagi hakamlar brigadasi boshqaradi.

ECHL bundan oldingi bosqichlarida, bir necha uchrashuvlarda hakamlar o'ta qo'pol xatolarga yo'l qo'yishdi. Bu natijaga tasir qildi yoki tasir qilmadi. To'g'ri, hakam - odam. Biroq butun dunyo nigohi aynan o'sha uchrashuvda bo'lib turgan paytda referilar xato qilishga haqqi yo'q.

Bir necha yillardan buyon o'zbek futbolidagi hakamlikda muammolar borligini bong urdik, Evropadan o'rnak olishimizni takidladik. Ammo, ko'xna qitaga ham ko'z tegdi chog'i, hakamlar qo'pol xatolarga yo'l qo'yishmoqda. Buning ortidan butun dunyoda ikki jamoaning muxlislari bir yoki bir necha holat borasida bir-birlari bilan janjallashishayotgani bor gap. 

Kechagi "El Klasiko"da ham hakamlik saviyasi juda yomon bo'ldi. Messining golida jarima zarbasi, Marselo holatidagi penalti. Yaxshi hamki, bu uchrashuv chempionlik uchun kurash yo'lida emasdi. Tasavvur qiling, ushbu bahs g'olibi LaLiga chempioni bo'lsa, ayni damda muxlislar qanday holatda bo'lardi? Menimcha, bir-birining "go'shtini eyishardi". Ammo unutmang, bu "El Klasiko". PepMour davridan keyin jangovorlikni biroz yo'qotgandek ko'ringandi. Ammo kecha biz yana o'sha davrlarni esladik. Biroq butun dunyo hakamlikni hali ham muhokama qilmoqda.

El-klasikoda ham hakamlar xato qildi

ECHL finali yaqinlashmoqda. "Real" finallarda qanday g'olib bo'lishni, "Liverpul" esa mag'lubiyatga uchrashni yaxshi biladi. Ammo 25 may kuni dahshatli bahs bo'ladi. Ikki jamoada ham hujumkor futbolchilar etarli. Ammo ko'ngil hijil. Hakamlik o'zini salbiy tomondan ko'rsatsa-yu, bu natijaga tasir qilsa finaldagi g'olib jamoa bir necha oylar davomida raqib klub muxlislari tomonidan tanqid qilinaveriladi. Xo'sh, Milorad Majich finalni boshqarish uchun loyiqmi?

1973 yilning 23 martida tug'ilgan Milorad 2009 yildan boshlab FIFA xalqaro hakami bo'lib ishlamoqda. ECHLda 2011 yildan ishlamoqda. U ilk jiddiy bahsini 2012 yilda boshqaradi. Unda PSJ - "Valensiya" jamoalari o'yinida 1:1 hisobidagi durang qayd etiladi. Etiborlisi, o'sha bahsda u 6 bora sariq kartochka ko'rsatgan. Keyinchalik u ECHL va Evropa ligasining bir necha yarim finallari va boshqa bir necha muhim bahslarida ishladi.

2014 yilda esa Evropa ligasi finalini boshqardi. "Sevilya" - "Benfika" jamoalari o'yini g'olibi penaltilar seriyasida aniqlandi.

O'tgan mavsumda esa "Real"ning ECHL finalidagi tarixiy g'alabasi qayd etilgan uchrashuvda to'rtinchi hakam bo'ldi. Ko'rib turganingizdek, u ko'p bora yarim finallarda ishlagan bo'lsa-da, bir bora Evropa ligasi finalini boshqargan xolos. Bo'lajak final u uchun birinchisi emas va oxirgisi ham. Demak, u finalni boshqarishga loyiq inson.

Albatta, so'nggi yillarda uning ism-familiyasini Aytekin yoki Atkinson kabi tilga olishmayapti. 25 maydan keyin ham shunday bo'lishini istaymiz. Milorad Majichni yomon xayol bilan eslamaylik. Nima bo'lsa ham, g'olib jamoa toza yutsin va hech kim g'oliblarni muhokama qilmasin. Olg'a, hakamlar! 

PS: (Oxiri baxayr bo'lsin)