Yarim himoyachi "lochinlar"ning asosiy futbolchilaridan biriga aylanib ulgurdi desak mubolag'a bo'lmaydi. Biz 10-turdan o'rin olgan "Buxoro"ga qarshi bahsdan keyin tajribali futbolchi bilan suhbat qurdik.
- CHempionat "Navbahor" uchun omadli boshlandi, biroq keyin pasayish bo'ldi...
- Mavsumning dastlabki ikki turini safarda o'tkazdik. Ilk turda Bekobodda durang va Olmaliqda g'alaba qozondik. So'ngra o'z uyimizda "Lokomotiv"ni taslim qildik. Keyin esa biroz pasayish bo'ldi, tan olaman. Umuman bu mavsumda barcha jamoalar deyarli teng kuchli ekanligini barcha ko'rib turibdi. Musobaqa jadvaliga qarang, hamma jamoa mag'lub bo'lishga ulgurdi. Oson o'yining o'zi bo'lmayapti. Har bir bahs finaldek o'tmoqda. Qaysidir o'yinlarda ochko yo'qotdik.
- O'tgan yil "Buxoro"da o'ynadingiz, ammo o'zingizni ko'rsata olmadingiz. SHu bois ushbu klubga qarshi bahsda o'zgacha ishtiyoq bilan tushdingizmi?
- Yo'q, bu narsa xayolimda yo'q edi. To'g'ri o'tgan yil "Buxoro"da u qadar ishlarim yurishmadi. Balki bir klubda ko'p yillar davomida o'ynab muhitni o'zgartirganim uchundir "Buxoro"ga kirishib keta olmadim. Ulug'bek Baqoevni hurmat qilaman, unga nisbatan hech qanday g'arazligim yo'q. Balki o'tgan yil buxoroliklar o'yin uslubiga tushmagandirman. SHu bois "Buxoro" bilan uchrashuvga oddiy o'yindek tushdim. Bir tur oldin o'z uyimizda "Neftchi"ni yuta olmadik. Harakat qildik, ammo o'xshamadi. SHu sabab muxlislar oldida qarzimiz bor edi. "Buxoro"ni safarda mag'lub etib o'sha qarzni uzdik deb o'ylayman. SHukurki og'ir o'yin bo'lishiga qaramay safarda 3 ochko oldik.
- Ko'pchilik "Buxoro"ga qarshi o'yinda "Navbahor" futbolchilari o'yinni ko'p bor vaqt cho'zishdi deb aytishmoqda. Bunga qanday qaraysiz?
- Mag'lub bo'layotgan har qanday jamoa raqibi vaqt cho'zayapti deb o'ylaydi. Bu tabiiy hol. Agar Akbar To'raevni aytishayotgan bo'lsa u maydonga jarohat bilan tushgandi, shu bois uchrashuvda ko'p bor shifokorlar yordamiga ehtiyoj sezdi. Muxlislar agar jamoasi yutqazayotgan bo'lsa raqib futbolchisi jarohat chetdan vaqt cho'zayotgandek tuyuladi. Masalan, bir tur oldin "Neftchi" bilan o'yinda ham farg'onaliklar deyarli shunday o'ynashdi va ko'plab futbolchilarga shifokorlar yordam berishdi. Ammo o'sha o'yinda biz raqibga hech qanday etiroz bildirmadik.
- Barcha "Navbahor"ni uy jamoasi demoqda. Bu fikrga qo'shilasizmi?
- Bu jamoaga yaqinda keldim. Aytishlaricha ikki yildan buyon "Navbahor" Namanganda hech kimga yutqazayotgan ekan. Bu yil etibor qilsangiz safarda ham ko'plab ochkolar jamg'ardik. SHunday ekan biz faqat uy jamoasi emasmiz. O'z maydonimizda yutqazmayotganimizda muxlislarning xissasi juda katta. Bu erda doim raqib safida o'ynagandim. O'zim "Navbahor" tarkibida o'ynab O'zbekistondagi eng yaxshi muxlislar ekanligiga amin bo'ldim.
- Superligadagi o'zgarishlar haqida nima deya olasiz?
- Superligadagi o'zgarishlardan keyin boshida to'g'risi qanday bo'larkin deb o'ylardik. Ko'rib turibmiz, har bir o'yin shiddatli o'tmoqda. Agar unday ruhda davom etsa 1-2 yilda saviya juda yuqoriga ko'tariladi. Masalan, musobaqa jadvalida pastda yurgan jamoa bitta g'alaba bilan yuqoriga, yuqoridagi jamoa esa bitta mag'lubiyat bilan pastga tushib ketishi hech gap emas. Raqobat juda kuchli.
- Ilhom Mo'minjonov bilan birinchi bor ishlayapsiz. U qanday murabbiy ekan?
- Superligada 10ta tur ortda qolgan bo'lsa, Ilhom Mo'minjonov bilan ishlash menga yoqmoqda. CHunki futbolchilarga maydonda ayniqsa oldi chiziqdagi o'yinchilarga erkinlik yaratib beradi. Ruhiy jihatdan ham futbolchilarni o'yinga yaxshi tayyorlaydi. SHu tomonlama ushbu murabbiy qo'l ostida ishlash menga manzur bo'lmoqda.
- Superligada yaxshi natijalar qayd etayotgan "Navbahor" O'zbekiston kubogi 1/16 finalida quyi liga vakili bo'lgan "Andijon"ga yutqazib qo'ydi. Bunga nima sabab bo'ldi?
- To'g'ri "Andijon"ga yutqazib qo'ydik. Bunga sabab sifatida undan oldin Superliga doirasida Jizzaxda "So'g'diyona" bilan bahsda 2:0 hisobida oldinda borib yakunda yutqazib qo'ydik. O'sha o'yin bizga juda kuchli ruhiy zarba bo'ldi. O'sha mag'lubiyatdan keyin ko'p vaqt o'zimizga kela olmadik. SHu orada Andijonga bordik va bitta gol o'tkazib kubokdan chiqib ketdik.
- "Lochinlar" safidagi legionerlar haqida qanday fikrdasiz?
- Darko Stanoevichni tanishtirib o'tirish shart bo'lmasa kerak. U bilan Olmaliqda birga o'ynaganman. Juda ham barqaror o'yinchi. Himoyachi Tomislav Payovich o'zidan yaxshi taassurot qoldirmoqda. SHuningdek Nenad Inyac ham jamoaga yordam bermoqda. So'nggi turlarni qo'lidan olgan jarohati tufayli o'tkazib yubordi. Tez orada Inyac maydonga tushadi deb o'ylayman.
- Yaqindagina 2019 yilgi Osiyo Kubogi musobaqasi uchun qura tashlandi. Unga ko'ra O'zbekiston terma jamoasi Yaponiya, Ummon va Turkmaniston bilan bir guruhdan joy oldi. Qura haqida fikrlaringiz?
- Osiyo Kubogida kuchsiz jamoa bo'lmaydi. Har bir jamoa saralashdan o'tib final bosqichiga chiqqan. Har bir futbolchi o'z mamlakati shani uchun harakat qiladi. Guruhda Yaponiya va O'zbekiston favorit. Menimcha Ummon va Turkmanistonni mag'lub eta olamiz. Yaponiya bilan o'yinda guruh g'olibi masalasi hal bo'ladi deb o'ylayman. O'zbekiston terma jamoasiga Osiyo Kubogida omad tilayman.
Narzulla Saydullaev
Bosh sahifaga
336