Muborak Ramazon oyidagi Superliga o'yinlari boshlanish vaqtlari

SHundan kelib chiqib, O'zbekiston futbol Associaciyasi hamda Professional futbol ligasi rahbariyati futbol uchrashuvlari vaqtini muxlislar talabidan kelib chiqib, qayta ko'rib chiqishi haqida avval xabar berib o'tilgan edi.

Jumladan, O'zbekiston futbol Associaciyasi 1-vice-prezidenti Umid Ahmadjonov bu borada quyidagi fikrlarni bildirib o'tgandi: “Muxlislarni futbol maydonlariga qaytarish uchun izlanishdan to'xtamaymiz. Ular uchun yaratib beriladigan har qanday sharoit birinchi navbatda o'zimizni ham xursand qiladi. Bunda birinchi galda iftorlik vaqtini hisobga olish kerak. Yani, futbol uchrashuvlari shunday vaqtga qo'yiladiki, bo'limlarning tugashi og'iz ochish vaqtiga yo'l ochib beradi. Islom diniga etiqod qiluvchi futbol muxlislarimiz iftorlik qilish hamda o'z farzlarini ado etish imkoniyatiga ega bo'lishadi”.

Ana shundan kelib chiqqan holda, muborak Ramazon oyida bo'lib o'tadigan Superliga bahslari quyidagi vaqtlarga belgilandi:

Superliga 12-tur
22 may

Soat 18:49 “Qo'qon-1912” – “Buxoro” (Jonli efir)
Soat 18:56 “Lokomotiv” – “Qizilqum”


13-tur
25 may
Soat 18:49 “Neftchi” – “So'g'diyona”
Soat 18:59 “Paxtakor” – “Bunyodkor” (Jonli efir)
Soat 19:20 “Buxoro” – “Nasaf”

26 may
Soat 18:50 “Navbahor” - AGMK (Jonli efir)
Soat 19:00 “Metallurg” – “Lokomotiv”
Soat 18:53 “Qo'qon-1912” - “Qizilqum”

Ko'rib turganingizdek, o'yinlar vaqti shunday tuzilganki, birinchi bo'lim tugaganini bildiruvchi hakamning hushtagidan keyin muxlislar iftorlik qilishlari va farzlarni ado qilishlari mumkin. Bu vaziyatda turli hududlarda quyosh botishi har xil vaqtga to'g'ri kelishi, shundan kelib chiqqan holda, og'iz ochish vaqtlari ham bir-biridan farq qilishi inobatga olingan.

Yana bir malumotni aytib o'tish zarur. 13-turdan o'rin olgan “Qizilqum” – “Qo'qon-1912” o'yini quraga ko'ra aslida Zarafshon shahrida bo'lib o'tishi kerak edi.

Ammo 2-turdagi “Qo'qon-1912” – “Qizilqum” o'yini Qo'qondagi stadionda rekonstrukciya ishlari olib borilayotgani tufayli Zarafshonda o'tkazilgan. SHu sababdan endi 13-turdan o'rin olgan o'yin Qo'qondagi “Markaziy” o'yingohida bo'lib o'tadi.