Tur hakami - Ravshan Ermatov
Ravshan Ermatov boshchiligidagi hakamlar brigadasi Qarshidagi "Markaziy" o'yinni juda odilona va bexato boshqarishdi. Ayniqsa CHeranning jarima maydonchasi ichida yiqilganda va Masharipovga nisbatan qoidabuzarlikni to'g'ri aniqlay olgan Ermatov so'zsiz tur hakami nominaciyada g'olib bo'ldi. Qayd etish kerakki, Ravshan Ermatov ketma-ket uchinchi marotaba eng yaxshi hakam deb topilmoqda.
Tur o'yini - "Nasaf" - "Paxtakor" (2:3)
Qarshida o'tgan markaziy uchrashuv kutilganidek shiddatli va murosasiz o'tdi. Uchrashuvda muxlislar jami beshta golga guvohlik qilishdi. O'yin mundarijasi ham voqealarga boy bo'ldi. Tezkor gol, tezkor javob to'pi. Yakunda esa irodali g'alaba. "Nasaf" ham, "Paxtakor" ham ishqibozlarga chiroyli va hujumkor futbol taqdim etishdi. Bu to'qnashuv o'z statusiga to'la mos ravishda o'tdi.
Tur muxlislari - "Qo'qon"da
Vodiy derbisini qabul qilgan Qo'qon shahrida mahalliy ishqibozlar ajoyib muhitni yarata olishdi. Qo'qonlik ishqibozlar butun bahs davomida juda faollik bilan o'z suyuklilarini qo'llab-quvvatlab turishdi. SHu boisdan ham ushbu turdagi eng yaxshi muxlislar nominaciyasida "Qo'qon-1912" ishqibozlari eng yaxshi bo'lishdi.
Tur matbuot xizmati - "Qizilqum"
Superliganing 11-turida o'yin atrofi va uchrashuv tafsilotlarini yoritishda "Qizilqum" matbuot xizmati ham juda yaxshi ishladi. Garchi mehmonda ishtirok etishganiga qaramasdan Aziz Nuriy qo'l ostidagi bo'lim juda faol va samarador ishladi. SHu boisdan ham bu gal turning eng yaxshi matbuot xizmati nominaciyasida "Qizilqum" matbuot kotibi Aziz Nuriy g'oliblikni qo'lga kiritdi.
Tur iqtibosi: "Raqibni kuchsizlantirish siyosatini o'z vaqtida "Milan" amalga oshirgan, "Paxtakor" emas"
"Paxtakor" ustozi SHota Arveladze "Nasaf"ga qarshi uchrashuvdan keyingi matbuot anjumanida "Paxtakor" raqibni kuchsizlantirish transfer siyosatini olib bormasligini bildirdi va quyidagilarni aytib o'tdi.
"Biz raqibni kuchsizlantirish uchun transferlarga qo'l urmaymiz. Bu ishni 80-90 yillar "Milan" amalga oshirgan. Men bu taktikadan xabardorman. CHunki "Milan" paytida bu ish bilan shug'ullangan", (c) SHota Arveladze
Tur goli - Arslonmurot Amonov
Superliganing 11-turida chiroyli gollar kam bo'lmadi. Ammo ularning ichida "Buxoro" vingeri Arslonmurot Amonovning "Loko" darvozasiga yo'llagan shedevr goli turni chinakamiga bezab berdi, desak mubolag'a bo'lmaydi. SHu tariqa Arslonmurot Amonovning kiritgan goli yaqqol ustunlik bilan tur goli deya etirof etildi.
Tur darvozaboni - Botirali Ergashev
Ushbu turda deyarli barcha jamoalar gol o'tkazib yuborishdi. Faqatgina AGMK va "Navbahor" jamoalari o'z darvozalari dahlsizligini saqlay olishdi. AGMK darvozaboni Pavel Matyashga Bekoboddagi bahsda umuman ish topilmadi. "Navbahor" kiperi Botirali Ergashev esa nisbatan qolgan hamkasblaridan faolroq ko'rindi. Ergashev "Qizilqum"ga qarshi bahsda o'z darvozasi tomon yo'llangan 3ta aniq zarbani bartaraf etishda jonbozlik ko'rsatdi va tur darvozaboni sifatida etirof etildi.
Tur murabbiyi - SHota Arveladze
Bu gal tur murabbiyi nominaciyasida "Paxtakor" bosh murabbiyi SHota Arveladze g'olib deb topildi. Qarshidagi juda qiyin va principial uchrashuvda muhim g'alabani qo'lga kiritgan Arveladze turning eng yaxshi murabbiyi sifatida etirof etildi. Markaziy bahs taqdirini hal etgan asosiy faktor, yani kerakli paytda to'g'ri futbolchini maydonga tushirgani ham o'yin natijasini o'z foydasiga hal etishda bevosita xizmat qildi.
Tur futbolchisi - Jaloliddin Masharipov
Superliganing 11-turida eng yaxshi futbolchi deb "Paxtakor" azosi Jaloliddin Masharipov etirof etildi. Masharipov "Nasaf"ga qarshi bahsda jamoasi g'alabasiga juda katta hissa qo'shdi. Birinchi golga mualliflik qilgan Masharipov, o'yin taqdirini hal etgan penaltini ishladi. SHuningdek, butun bahs davomida o'z qanotidan raqib himoyasiga ko'pgina tashvish tug'dirib turdi. SHu tariqa Masharipov 11-turning eng yaxshi futbolchisi deb topildi.
Bosh sahifaga
230