Italiya chempioni "Yuventus" bosh murabbiyi Massimiliano Allegri kelasi mavsumda ham jamoada qolishi aniq bo'ldi.
Kecha Turindagi Kontinasse shtab-kvartirasida rahbariyat va Allegri o'rtasidagi bo'lib o'tgan uchrashuvda ko'plab masalalar va yangi mavsum rejasi muhokama qilindi.
Uchrashuvda Allegrining klub bilan shartnomasini uzaytirish masalasi ijobiy hal etilmagan. Ammo shunisi aniqki, Allegri yangi mavsumda ham "Yuventus"da qoladi va shartnomasi yakuniga qadar jamoani shug'ullantiradi. Allegrining klub bilan amaldagi shartnomasi 2019 yilning yoziga qadar mo'ljallangan. Kelasi mavsum yozda esa yangi shartnoma bo'yicha qayta muzokara o'tkazish rejalashtirilgan.
Allegri "Yuventus"da to'rt mavsumdan buyon ishlamoqda va murabbiy har yili jamoaga "oltin dubl" taqdim etmoqda. Allegri ishlagan barcha mavsumlarda "Yuventus" Italiya chempionligi va Italiya kubogi sohibiga aylandi.
Yangi mavsumda "Yuventus"ning himoya chizig'i va markaziy yarim himoya qayta yangilanishi kutilmoqda. Jamoa hozirgacha darvozabon Mattia Perin, markaziy himoyachi Kaldara, qanot himoyachilari Spinaccola, Darmian, yarim himoyachilar Bonaventura, Kristante hamda Emre Jan masalasida og'zaki kelishuvga erishgani malum qilinmoqda. Tez orada ushbu transferlar rasman hal etilishi kutilmoqda.
Bosh sahifaga
2081