Ilhom Mo'minjonov: “1:0 hisobi bizni qoniqtirdi”

Ilhom Mo'minjonov: - Muhim uchrashuvda g'alaba qozondik. Futbolchilarimizga o'zlarini ko'rsatishgani uchun kattakon rahmat aytaman. Ushbu g'alabani unutgan holda ishlashda va izlanishda davom etamiz. Oldin ham aytib o'tganimdek, taktikani raqibga qarab tanlaymiz.

Murabbiylar shtabi va futbolchilar bilan raqib o'yin uslubini o'rganib chiqqandik. SHundan kelib chiqqan holda o'yinimizni tashkil etdik. Balki “Qo'qon-1912” jamoasiga qarshi bahsda boshqacha taktikada to'p surarmiz. Bir so'z bilan aytganda tanlagan taktikamiz o'z samarasini berdi. Uchrashuv davomida gol urish uchun bir qator imkoniyatlarga ega bo'lsakda, bitta vaziyatni golga aylantira oldik xolos. Bugungi uchrashuvda ayrim futbolchilarimiz jarohat tufayli, Mirzohid G'ofurov esa sariq kartochkalari soni to'rttaga etganligi sababli maydonga tusha olishmadi.

Ishonch bildirilgan futbolchilarimiz o'zlarini ko'rsatishdi va chiroyli g'alabaga erishdik. Bu futbol. Aslini olganda joriy yilgi mavsumda Superligada kuchsiz jamoaning o'zi yo'q. Bunga o'zinglar ham guvoh bo'lmoqdasizlar. Misol uchun “Qizilqum” jamoasi oldingi turda “Lokomotiv” maydonida durang o'ynab bugun Qo'qonda g'alaba qozondi. Bir so'z bilan aytganda qanday natija qayd etilishini oldindan aytib bo'lmaydi. Agarda raqib darvozasi oldida yuzaga keltirilgan vaziyatlarning barchasidan foydalana olganimizda yirik hisob qayd etilishi mumkin edi. Mashg'ulotlar chog'ida imkoniyatlardan foydalanish borasidagi kamchiliklarimiz ustida ishlaymiz. Qanday holat bo'lishidan qatiy nazar tablodagi 1:0 hisobi bizni qoniqtirdi.