Bugun futbol. “Navbahor” – “Qo'qon-1912”

Xabaringiz bor, terma jamoamizning Urugvayga qarshi o'rtoqlik uchrashuvi tufayli 14-tur bahslari nomalum muddatga qoldirilgan va shu bois 15-tur uchrashuvlari o'tkaziladi.

Bugun Namangandagi markaziy stadion muxlislar bilan to'lib toshishi kutilmoqda. Negaki "Navbahor" o'z maydonida "Qo'qon-1912"ni qabul qiladi. Agar birinchi davrada "navbahorchilar" safarda yutqazib qo'yganini hisobga olsak, bugungi bellashuvda ularni faqat g'alaba qoniqtiradi.

Turnir jadvalida "Navbahor" 3-o'ringa ko'tarilib olgan va juda yaxshi ketyapti. Raqib jamoa esa 15 ochko bilan 8-o'rinda boryapti.

Bilasizmi? "Navbahor" oxirgi to'rtta turni qatorasiga g'alaba bilan yakunladi. Jamoa safarda "Buxoro"ni yutib kelganidan keyin o'z maydonidagi uchta bellashuvda zafar quchdi. Va eng qizig'i, "Navbahor" "Qizilqum", "Metallurg" va AGMK bilan bo'lgan o'yinlarda birorta ham to'p to'tkazib yubormadi.

Umuman olganda, "Navbahor" oxirgi to'rt uchrashuvdan beri gol o'tkazmayapti. To'plar nisbati 8-0.

Fakt: "Navbahor" o'z maydonida hali yutqazmagan. Jamoa besh marta zafar quchgan bo'lsa, ikki bor durang o'ynagan.

"Qo'qon-1912" haqida gapiradigan bo'lsak, bu jamoa negadir oxirgi paytlarda o'zini ko'rsata olmayapti. Oxirgi marta o'z maydonida "Bunyodkor"ni mag'lub etganidan beri bu jamoa boshqa g'alaba qozonmadi. Yani, oxirgi to'rtta o'yindan ikkitasi durang va yana ikkitasi mag'lubiyat.

Fakt: Qo'qonliklar hozircha faqat uchta g'alabaga erishgan. SHundan bittasi safarda "Qizilqum" ustidan qo'lga kiritilgan. Ikkita g'alaba uydagi bellashuvlarda kuzatilgan: "Navbahor" va "Bunyodkor" bilan.

Bilasizmi? Bu mavsum hisobidan "Qo'qon-1912" birinchi marta ketma-ket ikki bor mag'lubiyatga uchradi. Jamoa ikkala mag'lubiyatini ham uyda "Buxoro" va "Qizilqum"dan qabul qilib oldi.