PFL “Labsa” futbol klubini ogohlantiradi

O'yin 18:00 ga tayin qilingandi. Biroq mezbon jamoa “Labsa” stadiondagi xavfsizlik masalalarini talab darajasiga keltirmagan. Uchrashuv komissari Baxtiyor Namozov bunday sharoitda o'yin o'tkazishga ruxsat bermagan. Mezbonlar esa shundan keyingina harakatga tushgan.

O'yinda “Labsa” vakillariga texnik mag'lubiyat yozishga yaqin qolgandagina komissar talab qilgan minimum masalalar hal etilgan. Uchrashuv esa 18:30 da start olgan.

PFL mazkur holat yuzasidan “Labsa” futbol klubi rahbariyatini jiddiy ravishda ogohlantiradi va yana 1 ta o'yin uchun imkoniyat beradi. Kelasi turda ham shunday holat davom etsa, komissar 5 daqiqa ham kutmaydi va mezbon jamoaga texnik mag'lubiyat elon qiladi.

Malumot uchun, PFL yaqindagina “Yozyovon-Lochinlari” futbol klubini jiddiy ogohlantirgandi. 17 iyun — yakshanba kuni mazkur klub o'z maydonida “Iftixor”ni qabul qiladi. Agar maydonda ijobiy o'zgarishlar ko'zga tashlanmagan bo'lsa, “Yozyovon-Lochinlari”ning uy uchrashuvlarini o'tkazish yoki umuman chempionatdagi keyingi faoliyati qayta ko'rib chiqiladi.

“Labsa”ning navbatdagi uy o'yini esa 21 iyun kuni “Yozyovon-Lochinlari”ga qarshi bo'lib o'tadi. O'sha uchrashuvdagi xulosa mezbonlarning Pro-Ligadagi keyingi taqdirini belgilab berishi mumkin. 17 iyun kuni “SHerdor”ni qabul qiladigan “G'ijduvon” klubi ham vaziyatni nazoratga olishi talab etiladi.

Pro-Liga klublariga butun bahor davomida ish yo'lga tushib ketishi uchun vaqt berildi. Iyun oyidan boshlab esa talablar hamma uchun qatiydir. O'z ustida ishlamaydigan va vaqtinchalik bo'lgan klublar faoliyatini bemalol 2-ligada davom ettirishi mumkin. Pro-Liga talablari esa o'z kuchida qoladi.