- Assalomu alaykum Salimjon aka! Bugungi g'alaba bilan tabriklaymiz! Turnir jadvaliga qarasak, bugun qo'lga kiritilgan 3 ochko bilan“Yozyovon” jamoasi 2-o'ringa joylashdi. Bugungi uchrashuv haqida va umuman birinchi davra haqida nimalar deya olasiz?
- Tabrik uchun rahmat! Mavsum boshida jamoamiz oldiga birinchi davrani kuchli uchlikda yakunlash vazifasi qo'yilgan edi. Buning uchun kamida 30 ochko to'plashimiz zarur edi. Biz bu vazifani qaysidir manoda uddaladik. Birinchi davra yakunida o'z maydomizda ikki marta durang o'ynadik, agar bu uchrashuvlarda g'alaba qozonganimizda, balkim hozir turnir jadvalida birinchi o'rinda bo'larmidik. O'tkazilgan uchrashuvlar biz uchun og'ir kechdi. Sababi bizda zahiradan maydonga tushib o'yinni kuchaytira oladigan futbolchilar yo'q edi, shu bilan bir navbatda birinchi davra davomida jarohatlar ham bizga o'yinlarni to'liq kuch bilan tashkil etishimizga yo'l qo'ymadi. SHunday xolatda bo'lsada, har bir uchrashuvda oxirigacha kurashgan shogirdlarimga rahmat aytaman, qo'lga kiritilgan ochkolar aynan ularning shijoati evaziga kiritildi.
Bugungi uchrashuv haqida aytadigan bo'lsak, “Xotira-79” jamoasi bilan bo'lib o'tadigan uchrashuvga jiddiy tayyorgarlik ko'rgandik, bugun faqat g'alaba uchun kelgandik. Ushbu uchrashuv uchun himoyaviy taktika tanladik, sababi “Xotira-79” jamoasi tarkibida ham tajribali futbolchilar bor, mana ulardan biri Sobir Xamidov bugun darvozamizni ishg'ol etdi. Biz tanlagan himoyaviy o'yin taktikasi ish berdi, uchrashuv davomida raqib darvozasini 3 bor ishg'ol etib, yakunda g'olib bo'ldik.
- Davralar oralig'ida “Yozyovon” jamoasi qanday maqsadlarni rejalashtirmoqda? Jamoa tarkibiga yangi futbolchilar kelib qo'shiladimi?
- Biz shu taxminan 10 kunlar atrofida Superliga vakillari "Qo'qon-1912" va "Navbahor", "Neftchi" jamoalari bilan o'rtoqlik uchrashuvlari tashkil etmoqchimiz. Bu jamoalar bilan hozirgi kunda muzokaralar olib borayapmiz, agar kelishuv muvaffaqiyatli yakunlansa, biz bu jamoalar bilan o'rtoqlik uchrashuvida maydonga tushamiz. Tarkibimizga yangi qo'shiladigan futbolchilar haqida gapirsak, hozircha rasman shartnoma imzolanmagunicha ularning ismlarini oshkor qilmagan maqul. Birinchi davra davomida qaysi chiziqni kuchaytirish lozim ekanligini ko'rib oldik, albatta tarkibimizga yangi futbolchilar kelib qo'shiladi.
SHuningdek jamoamiz davralar oralig'ida Quvasoy shahridagi “Arsif” dam olish maskanida yig'in tashkil etishi rejalashtirgan, 10 kun davomida bu joyda mashg'ulotlar olib boramiz. SHu turnir jadvaliga qarasak, moliyaviy imkoniyatlarimiz yuqori bo'lmasada, viloyatimizdagi boshqa jamoalaridan ko'p ochko jamg'aribmiz, egallab turgan o'rnimiz ham yuqoriroq ekan, buni albatta chiqarib qo'yinglar.
Jamoamiz nomidan O'zbekiston professonal futbol ligasiga, rahbarlariga minnatdorchilik izhor qilamiz. Birinchi davra davomida qimmatli vaqtini ayamasdan, bizning uchrashuvlarga tashrif buyurib, uchrashuvlarni yoritayotganligi uchun “championat.asia” sayti ijodkorlariga katta rahmat, yaqinda nishonlagan kasb bayramlari yana bir bor muborak bo'lsin!
Bekzod Tolibov yozib oldi.
Bosh sahifaga
2069