19-bor tashkil etilgan bu yilgi mazkur musobaqada 2005 yilda tug'ilgan o'smirlardan iborat 22 ta jamoa 4 mintaqaga bo'lingan holda g'oliblik uchun o'zaro bahs yuritishdi.
Guruh uchrashuvlari Toshkent viloyatining G'azalkent va Qiziltog' shaharlarida shuningdek, Ahmad Yassaviy va Alisher Navoiy nomli stadionlarda uyushtirildi. O'z guruhlarida birinchi o'rinni egallagan Sport o'yinlari turi va engil atletika bo'yicha ixtisoslashtirilgan sport maktabi jamoasi, Zangiota, Andijon va CHirchiq jamoalari keyingi bosqich yo'llanmalarini qo'lga kiritishdi. 29 iyun kuni Yuqorichirchiq tumanidagi Ahmad Yassaviy nomli stadionda yarim finalning dastlabki to'qnashuvida sport o'yinlari turi va engil atletika bo'yicha ixtisoslashtirilgan sport maktabi jamoasi zangiotalik tengqurlarini yirik 3:0 hisobida dog'da qoldirishdi.
Vodiydan tashrif buyurgan andijonlik yosh futbolchilar CHirchiq jamoasi bilan kuch sinashib, 3:1 hisobida zafar quchishdi. Kecha Qiziltog' shaharchasi stadionida sovrinli pog'onalarni egallagan jamoalar nomini aniqlab berdi. Jumladan, 3-o'rin uchun kechgan qarama-qarshilikda chirchiqlik yosh futbolchilar Zangiota jamoasini 1:0 hisobida mag'lubiyatga uchratishdi.
Finalda esa sport o'yinlari turi va engil atletika bo'yicha ixtisoslashtirilgan sport maktabi jamoasi Andijon shahri vakillari bilan ro'baro' kelishdi. Keskin va murosasiz o'tgan uchrashuvda mehmonlarning qo'li baland keldi, 0:2. Turnirning taqdirlash marosimida taniqli sport sharhlovchisi Axbor Imomxo'jaev, sobiq “paxtakor”chi SHamil Yafarov hamda O'FA mutaxassisi Oybek Yunusovlar ishtirok etishdi.
Musobaqa tashkilotchilari va homiylar tomonidan tasis qilingan diplomlar, medallar hamda esdalik sovg'alari o'z egalariga topshirildi. Qolaversa, Qiziltog' mahalla fuqarolar yig'ini faollari turnir davomida o'zlarining chiroyli harakatlari bilan muxlislar olqishiga sazovor bo'lgan yosh futbolchilarga alohida sovrinlarni topshirishdi.
Quyidagilar turnirning “eng yaxshilari” deb topilishdi:
“Eng yaxshi darvozabon” – Ahmadjonov Otabek (Andijon)
“Eng yaxshi himoyachi” – Tolibjon To'xtasinov (Zangiota)
“Eng yaxshi yarim himoyachi” – Axmedzyanov Abror (CHirchiq)
“Eng yaxshi hujumchi” – Jasur Fayzullaev (Sport o'yinlari turi va engil atletika bo'yicha IBO'SM)
“Eng yaxshi to'purar” – Azizbek Usmonov (Andijon)
Bosh sahifaga
173