Nodirxo'ja Yuldashev. 2015 yilda Sidneydan Rimgacha, O'ZBEKISTONdan qo'ymasin!

Yilni saytimizda boshlagan o'quvchilar ushbu maqolani o'qiyotgan ekanlar, demak sog'-salomatlar! Bu esa biz uchun juda muhim! Yurtimiz tinch, xonadonimiz obod, dasturxonlarimiz to'kin. Bundan ortiq bizga yana nima kerak? Menimcha hech nima... JCH deysizmi? To'g'ri, barchamizning orzuimiz jahon chempionatiga chiqish, jamoalarimiz OCHLni yutsin deymiz. Futbolchilarimizni kuchli beshlikda ko'rsak deymiz. Lekin tan oling, bugun bayram-a? Bayramda, dasturxon atrofida oila yoki do'stlaringiz davrasida o'tirganingizda futbol haqida o'ylaysizmi? Futbol haqida gap boshlay desangiz, bugun bayram, oilang davrasida o'tirsangchi, degan javobni olasiz. Haqiqatdan ham, yaxshilab etibor bering, bir o'yinni deb, kerakmi shuncha asab buzarliklar? Menimcha, yo'q. Hayot go'zal va muhimi shu. Yashasin O'zbekiston, Vatanimiz barcha yo'nalishlarda ravnaq topsin. Aslida eng muhimi ham shu. Futbol o'z yo'liga, hali bizning ko'chamizda ham bayram bo'ladi. Ko'rasiz, shundayligicha qolib ketmaydi. Mana qarang, Paxtakor boshlab bergan ishni Nasaf va Bunyodkor jamoalari davom ettirdi. Yosh, istedodli futbolchilar ko'paydi. Hali ko'rasiz, ularning safiga Lokomotiv, Neftchi va yana boshqa klublarimiz qo'shilishsin, umuman boshqacha bo'ladi, ishonavering. Faqat vaqt kerak. O'sha kunlarni ko'ra olmarmikinmiz, deyapsizmi? Ko'rsak, ko'rmasak yuqorida aytib o'tdim, futbol bu shunchaki bir o'yin. Muhimi, oilamiz tinch bo'lsin! 

Yil so'nggidagi maqolam biroz futboldan chetga chiqadi.

2015 yilni Avstraliyaga sayohat bilan boshladik. Sidneyga Malayziyaning Kuala-Lumpuri orqali uchib bordik. Kuala-Lumpurda bo'lar ekanmiz, Farhod va Sadriddin bilan uchrashishimiz kerak edi. Ammo, ular istiqomat qilayotgan shaharda suv toshqini bo'lganligi uchun ko'plab kishilar vafot etgan, yo'llar yopilgan edi. Sidney tomon uchdik. U erda bizni Osiyo Kubogida ishtirokini boshlashi kerak bo'lgan O'zbekiston terma jamoasi kutib turgan edi. Avstraliya juda qimmat davlat. Aytishingiz mumkin, u erda maoshlar juda yuqori. Ha, to'g'ri, ammo maosh olish uchun ishlash kerak. Ishingiz yo'qmi, kinolarda ko'rganingizdek, uyi musodara bo'lgan, ijarada yashagan, oilasida tinchlik yo'q. SHunday paytda o'ylab qolasan kishi, bazan etishmovchilikdan noliydiganlar bilsa edi, ularni uyi bor, toshqindan yiroq vatani bor, tepasida tomi bor xonadoni bor, qora qozoni doimo qaynaydi. Aslida ular havas qilsin bizning yurtga deb yuborgin keladi. 

Masalan, men hecham ota-onamsiz yashashni tasavvur qila olmayman. Civilizaciya bor deb ataydigan davlatlarimizda bolalar tezroq 18 yoshga to'lishini kutadi. To'lsa-yu, boshqa shaharga o'qishga ketsa. O'sha erda yashasa, ota-onasini faqat bayram kunlari onda-sonda eslab tursa. Biron-bir sababsiz istagan payt qarindoshlarimizni ko'rib, uzoq suhbat qurib qaytamiz. U erda unaqasi yo'q. Hamma ish bilan ovora, ishlamasa yuqoridagi vaziyat... SHuning uchun ham O'zbekistonni yaxshi ko'raman! Bu shunchaki gap-so'zlar emas. Buni qalban xis qilib aytyapman.

Masalan, 2015 yilni Evropa sayyohati bilan tugatdim. Franciya, Ispaniya va Italiyada yurar ekanmiz, sayyohlarni olib yuruvchi gid Evropada hayot oson emasligi, bu erga deyarli har bir mahsulot horijdan keltirilishi, yildan-yilga narx-navoning oshayotganini aytib berdi. Masalan, Italiyada benzin narxi 8000 so'mdan oshiq. Taksi uchun licenziya olish esa 100 000 evroga teng. Daromadning teng yarmi soliqqa ketadi. Haydovchiga o'zimizning sharoitimizni aytib berganimizda, avvaliga ishonmadi, keyin sizlar jannatda yashar ekansizlar-ku, deya havas bilan qarab qo'ydi.

Bazan chet elni o'zimizga solishtirib tanqid qilaman, lekin bu turmush tarzimizni emas, futboldagi holatlarni o'z ichiga oladi. Bir narsani ishontirib aytamanki, o'zbek tilida shu maqolani o'qib turgan insonlar borki, sizlar eng go'zal va tinch Vatanda istiqomat qilyapsizlar. Yangi yil ham yurtimiz uchun mana shunday osoyishta va yaxshi kunlarga boy bo'lsin, yangi yilingiz bilan saytimizning o'quvchilari!  

Agar saytimiz tomonidan bugun kun davomida berib borilgan yangi yilga oid xabar va maqolalar sizlarga manzur bo'lgan bo'lsa, bizga mana shuning o'zi katta baxt.

Nodirxo'ja Yuldashev