"O'ylaymanki, bugungi o'yinni tomosha qilish uchun stadionga tashrif buyurgan muxlislar yaxshi kayfiyatda uyga qaytishdi. CHunki, ikkala jamoa ham hujumkor va shiddatli o'yin namoyish etib berdi. Futbolchilarimiz ko'rsatgan o'yin va uchrashuv natijasidan ko'nglim to'ldi. Ularga rahmat aytmoqchiman.
Muhim uch ochkoni qo'lga kiritganimizdan xursandmiz. Oson bo'lmagan o'yinda irodali g'alabaga erishdik. Har bir o'yinda qiyinchilikka duch kelyapmiz. Xuddi shunday holat boshqa jamoalarda ham ko'zga tashlanyapti.
Ustiga-ustak kunning juda ham issiq bo'layotgani ham o'z tasirini o'tkazmay qolmayapti. Bunday ob-havo sharoitida nafaqat futbol o'ynash, balki ko'chada yurish ham qiyin. Mutaxassislar xatto ko'chaga chiqmaslikka ham chaqirishyapti. O'zi odatda iyul oyida davralar oralig'idagi tanaffus bo'lardi. JCH-2018 sabab bu tanaffus iyun oyiga to'g'ri keldi.
Fursatdan foydalanib, jamoamiz, sportchilar va o'z nomimdan muhtaram Prezidentimiz SHavkat Miromonovich Mirziyoevni bugungi tavallud ayyomlari bilan muborakbod etaman. Yurtimiz ravnaqi yo'lida olib borayotgan islohotlarida kuch-quvvat tilayman", - dedi M.Qosimov.
Bosh sahifaga
177
