Neftchi: Ertaga jamoa Qirgulida yig'iladi

Ertaga “Neftchi” yangi mavsumga tayyorgarlikni davom ettirish uchun Qirgulidagi bazada yig'iladi. Bu yig'inda O'zbekiston OTJ bilan xorijga yo'l olgan Sardor Rahmonov, Abdumavlon Abdujalilov va Doston Tursunovlar ishtirok etishmaydi. Ular Osiyo chempionatidan so'ng tarkibga qo'shilishadi. SHuningdek, Muxsin Ubaydullaevning ham Farg'onaga qaytishi kutilmoqda. Jamoa rahbariyati o'tgan mavsumda “Neftchi” tarkibida harakat qilgan aksariyat futbolchilarni tarkibda saqlab qolishni reja qilgan. SHuningdek, ayni paytda shartnomasi nihoyasiga etgan futbolchilar bilan yangi kelishuvlar borasida muzokaralar ketmoqda.  

“Neftchi” o'tgan mavsumni chempionatimizning eng kuchli 4 ta jamoasidan keyingi o'rinda  yakunladi. Jamoa futbolchilari bu yilgi chempionatda ham muvaffaqiyatli ishtirok etib, xar bir o'yinda zafar quchgan holda farg'onalik muxlislarni xushnud etish niyatida. Albatta, bu borada muxlislarning qo'llab-quvvatlashi, daldasi beqiyosdir.

Ertaga Qirgulida yig'in boshlanadi. Jamoa bosh murabbiyi Andrey Fyodorov ayni paytda Moskvada. Murabbiy ertaga tong sahar Moskva – Farg'ona yo'nalishi bo'yicha Farg'ona shahriga etib keladi va yangi yildagi ilk yig'inda futbolchilarga o'zi boshchilik qiladi. “Neftchi” tarkibdagi o'zgarishlar, jamoani tark etganlar xususida keyinroq xabar beramiz.

“Neftchi” PFK matbuot xizmati.