PFL "SHerdor" klubi va ikki nafar futbolchini nega ogohlantirdi?

Klublar yozgi transferlar oynasi ochiq paytda bir qator yangi futbolchilar bilan o'z saflarini to'ldirishga harakat qilishdi.

Samarqandning “SHerdor” klubi ham tarkibga yangi o'yinchilarni jalb etdi. Biroq PFLning maxsus ishchi guruhi vaziyatni chuqur o'rgangach, “SHerdor” klubi bilan shartnoma imzolagan ikki futbolchi bu jarayonda qoida buzilishiga yo'l qo'ygani malum bo'ldi.

Gap shundaki, aslida transfer huquqi “Mashal” jamoasiga tegishli bo'lgan Tursunmurod Hamdamov yil so'nggiga qadar “Zomin” jamoasiga ijaraga berilgan edi. Biroq yozgi transferlar vaqtida “SHerdor” bilan kelishuvga erishgan futbolchi “Zomin” bilan tuzilgan amaldagi ijara-shartnomasini bekor qilib o'tirmasdan Samarqand klubi tomonidan taklif qilingan shartnomaga imzo chekkan.

SHuningdek, “Zomin” jamoasi safida o'ynab kelayotgan Ubaydulla Nabievda ham “SHerdor” safiga o'tish niyati paydo bo'ladi. “Zomin” bilan tuzilgan amaldagi shartnomani bekor qilish uchun esa Nabiev aslida samarqandlik ekani hamda uylanish niyati borligini vaj sifatida ko'rsatadi.

Mazkur ikki holatni chuqur tahlil etgan PFL ishchi guruhi har ikki vaziyatda ham futbolchilar aybi salmoqli ekanini qayd etdi. Zero bir jamoa bilan amalda shartnomasi bo'la turib, ikkinchi klub taklif etgan shartnomaga imzo chekish hech qanday qoidalarga to'g'ri kelmasligini barcha juda yaxshi biladi. Agar boshqa bir klub moliyaviy jihatdan yaxshiroq shartnoma taklif etadigan bo'lsa, ayni vaqtda o'ynab turgan klub bilan tuzilgan amaldagi shartnoma ikki tomonning roziligi bilan bekor qilinishi talab etiladi. SHu sababdan ham har ikki futbolchi jiddiy tarzda ogohlantirildi. Biroq hali ularning yosh ekani inobatga olinib, har ikkala o'yinchiga ham bundan buyon qonun buzilish holatlariga yo'l qo'ymasligi tushintirildi.

Agar qaysidir futbolchi amalda shartnomasi bo'la turib, boshqa klub bilan shartnoma imzolaydigan bo'lsa, PFL o'sha o'yinchini malum muddatga futbol faoliyatidan chetlatadi.

SHuningdek, PFL “SHerdor” futbol klubini ham ogohlantirdi. Kelgusida ham mazkur klub boshqa jamoaga tegishli futbolchilar bilan o'zboshimcha tarzda shartnoma tuzgudek bo'lsa, “SHerdor”ga nisbatan jiddiy sankciyalar qo'llaniladi.