Bugun tonggi soat 6:10da Islom Karimov nomidagi Toshkent xalqaro aeroportida O'zbekiston MTJni boshqarib boradigan argentinalik mutaxassis Ektor Kuperni tantanali kutib olish marosimi bo'lib o'tgani xaqida xabar berib o'tgan edik.
Bugun Milliy olimpiya qo'mitasida O'zbekiston futbol associaciyasi 1-vice Prezidenti Umid Ahmadjonov milliy terma jamoamizning yangi murabbiyini qabul qildi. Uchrashuv davomida Umid Ahmadjonov murabbiy bilan suhbatlashar ekan, futbolimizda olib borilayotgan islohotlar bilan o'rtoqlashib, o'zbek xalqining azaliy orzusi bo'lgan jahon chempionitiga chiqish eng dolzarb vazifa ekanligini aytib o'tdi.
"Bizning xalqimiz juda ham futbolsevar. Siz milliy terma jamoamizni boshqarib borishingiz elon qilinganidan keyin, yurtimizdagi futbol muxlislari bu xabarni katta quvonch bilan kutib olishdi. Asosiy maqsadimiz oldimizda turgan katta musobaqalarda ijobiy natijalarga erishish, Tokio-2020 hamda Jahon chempionati-2022 yo'llanmasini qo'lga kiritish.
O'zbekiston futbol associaciyasi buning uchun Sizga barcha sharoitlarni yaratib beradi. Murabbiylar ishiga hech kim aralashishiga yo'l qo'yilmaydi. Barchamiz bir tanu bir jon bo'lib oldimizga qo'yilgan maqsadlarga erishamiz degan umiddaman", - dedi Umid Ahmadjonov.
O'z o'rnida Ektor Kuper ham bu yo'lda bor kuch-g'ayratini ayamasligini bildirib o'tar ekan, aeroportdagi kutib olish marosimidan hayratda ekanini yashirib o'tirmadi.
Uchrashuv so'ngida Umid Ahmadjonov Ektor Kuperga uning nomi tushirilgan O'zbekiston milliy terma jamoasining ramziy libosi hamda esdalik sovg'alarini topshirdi.
Eslatib o'tamiz, bugun soat 15:00da Milliy olimpiya qo'mitasining anjumanlar zalida Ektor Kuper bilan matbuot anjumani tashkil etiladi. Matbuot anjumanida barcha turdagi ommaviy axborot vositalari xodimlari qatnashishlari mumkin.
Bosh sahifaga
934