To'g'risi, Andijon viloyatining asosiy jamoasi u qadar kuchli bo'lmasada, hududlarda mahalla futboli havas qiladigan darajada rivojlangan. Tumanlardagi mavjud mini-stadionlar doim gavjum.
Viloyat mutasaddilari aholining eng sevimli sporti turi - futbolni keng targ'ib qilish, asosiysi - qishloq yoshlari ichidan eng iqtidorli sportchilarni tanlab olish uchun mavjud 878 ta mahalla jamoalari o'rtasida nufuzli musobaqa uyushtirdi.
18 yoshdan 30 yoshgacha bo'lgan mahalliy futbolchilardan tuzilgan jamoalar 1 avgustdan boshlab “Viloyat hokimi Kubogi”da ishtirokini boshladilar. Jamoalar birinchi bosqichni o'z sektorlarida o'tkazib, ikkinchi bosqich tuman birinchiligiga yo'l oladi. O'z tumanida g'olib bo'lgan jamoalar viloyat bosqichida to'p suradi.
“Oddiygina mahalla yigitlari ichida kelajagi porloq futbolchilarni kashf qilyapmiz. Mazkur musobaqa, yangi iqtidorlarni tanitish bilan birgalikda, yoshlar o'rtasida futbolni ommaviyligini yanada oshirishga yordam beradi”,-deydi viloyat futbol associaciyasi birinchi vice-prezidenti Bekzodbek Karimov.
Musobaqaning final o'yini 22 avgust kuni “Sog'lom avlod” stadionida bo'lib o'tadi. Birinchi o'rinni olgan jamoa mahallasiga zamonaviy mini-stadion qurib beriladi. Sovrindor jamoalarga esa katta summadagi sport jihozlari topshiriladi.
Elmurod Ermatov, Andijon
Bosh sahifaga
312