Har bir ochko muhim ahamiyatga ega bo'ladi. “Qo'qon-1912” jamoasi uchun ham oldindagi ikkita uchrashuv haqiqiy finalga teng desak, mubolag'a bo'lmaydi. CHempionlik yo'lida kurashni davom ettirish uchun futbolchilar oldinda turgan ikkala uchrashuvda ham g'alaba qozonishlari talab etiladi. Buning uchun esa muxlislarning ko'magi muhim o'rin tutadi.
Malumki, azaldan Qo'qonlik futbol ishqibozlari mamlakatimizda etakchilaridan bo'lib kelishgan. Muxlislar o'tgan yili PFL tomonidan eng yaxshi deb tan olingani bejiz emas. Bu yil ham ishqibozlar futbolchilarni alo darajada qo'llab-quvvatlab kelishmoqda. Jamoaning eng og'ir damlarida ishqibozlarning daldasi futbolchilarga ruhiy madad bo'ldi. Qiyin damlarda ham sizlar jamoani tinimsiz olqishlab turdingiz. Natijada muvaffaqiyatsiz o'yinlar o'rnini g'alabali seriya egalladi. Buning uchun sizlardan har qancha minnatdor bo'lsak arziydi.
“Qo'qon-1912” klubi o'z muxlislari bilan har doim faxrlanib kelgan va doim ham shunday bo'lib qoladi. “Qo'qon-1912” jamoasi har doim muxlislar uchun o'ynaydi.
Yana ikki kundan keyin Qo'qonda haqiqiy futbol bayrami bo'ladi, desak adashmaymiz. “Markaziy” o'yingohda chempionat peshqadami Toshkentning “Paxtakor” jamoasi mehmon bo'ladi. Ushbu o'yindagi g'alaba jamoaning kuchli oltilikka kirishi uchun katta imkoniyat yaratadi.
SHu kuni g'alaba qozonib, Qo'qon xalqiga haqiqiy bayram taqdim etishni maqsad qilgan futbolchilar uchun siz aziz muxlislarining qo'llab-quvvatlab turishlaringiz katta ruhiy madad bo'lishi tayin. Buni sizlar ham his etib turgangizga shubha yo'q. SHu kuni barcha birlashib, stadionni to'ldirib, jamoani qo'llab-quvvatlashiga ishonchimiz komil.
“Navbahor”ning o'z maydonidagi uchrashuvlarida muxlislar haqiqiy 12-o'yinchi bo'layotgani haqida eshitib ko'pchilikning havasi keladi.
Qo'qonlik futbol muxlislari ham ulardan qolishmay barchaning havasini keltirishlari shubhasiz.
Aytgancha, so'nggi uch yildan beri “Paxtakor” Qo'qonda g'alaba qozona olmayapti. Bunda muxlislarning beqiyos hissasi borligini takidlash joiz. O'tgan yili “Paxtakor” bilan bo'lgan bahsda “Markaziy” stadion ishqibozlar bilan to'lib-toshganini ko'pchilik maroq bilan eslaydi. Bo'lajak uchrashuvda ham shunday holat takrorlanishini istaymiz va shunday bo'lishiga ishonamiz.
Qo'qonlik futbol muxlislar hech qachon jamoani yolg'izlatib qo'yishmagan. Biz sizlarga ishonamiz. SHu kuni muxlislarga yuqori kayfiyatda taqdim etish uchun o'yindan oldin koncert dasturi taqdim etiladi. Unda taniqli xonanda Ramzbek Abdurahmonov o'zining qo'shiqlari bilan muxlislarga xushkayfiyat bag'ishlaydi. Ham koncert dasturi ham super o'yin guvohiga aylanish imkoniyatni qo'ldan boy bermaysiz, degan umiddamiz.
Takror aytamiz, bo'lajak bahsda muxlislarimizning qo'llab-quvvatlashlari har doimgidan-da muhim.
Qo'qonlik futbol muxlislarining butun mamlakatga haqiqiy kuchlarini namoiysh etadigan payt keldi. Ishqibozlik qanday bo'lishini ko'rsatish fursati etdi. Olg'a, Qo'qon!
Barchangizni stadionda kutib qolamiz. Uchrashuv 12 avgust kuni soat 18:30da boshlanadi.
"Qo'qon-1912" matbuot xizmati
Bosh sahifaga
284