"Olmaliq": 10 nafar futbolchi ketdi, Naumov va Berdimurodov keldi

"Olmaliq"ning dastlabki yig'ini dekabr oyida bo'lib o'tganini xabar bergan edik. Ikkinchi yig'in 4 yanvardan 13 yanvarga qadar davom etadi. Jamoa azolari 8 yanvar kuni tibbiy ko'rikdan o'tadi. 10 yanvarda Toshkentning "Bunyodkor" jamoasi bilan nazorat o'yini o'tkazish rejalashtirilgan. Tarkibdagi o'zgarishlar borasida aytadigan bo'lsak, jamoani bir qator futbolchilar tark etishdi. Ular Valeriy Fomichyov, Timur G'aniev, Sarvarjon Jo'raev, Saxob Jo'raev, Obid Jo'raboev, G'ulom O'runov, Jahongir Abdumo'minov, Salamat Qutiboev, SHavkat Salomov, Nemanya Yovanovich va Alisher SHog'ulomovlardir. Bu futbolchilarga "Olmaliq" jamoasi natijalariga qo'shgan hissalari uchun tashakkur bildiramiz va keyingi faoliyatlarida omad tilaymiz.

Jamoaning bugungi mashg'ulotlarida 25 nafar futbolchi ishtirok etdi. Birinchi yig'inda ko'rikda bo'lgan uch nafar futbolchi Farrux Axunov, Doniyor Inomov va Robert Jilin bu gal mashg'ulotlarga chaqirilmadi. Mashg'ulotlarga jamoamiz azolari ikki darvozabon Nikita SHkvirin va Maksim Kriushev hamda olimpiya terma jamoasi yig'inida bo'lgan Diyor Turopov va Doniyor Ismoilovlar qo'shilishdi. SHuningdek, yana bir posbon Mixail Naumov, himoyachi Rahmatillo Berdimurodov, yarim himoyachi Dilshod Fayziev ("Namuna", Toshkent), hujumchi Timur Ergashev ("CHust-Paxtakor")lar ham "Olmaliq" tarkibida yangi mavsumga tayyorgarlik olib borishmoqda.

Bundan tashqari, jamoa murabbiylar shtabiga o'tgan mavsum G'uzorning "SHo'rtan" jamoasida faoliyat olib borgan Jamshid Umarov qabul qilindi. Jamshid Xurshidovich jismoniy tayyorgarlik bo'yicha murabbiy hisoblanadi.