Ana xolos! “Surxon” Inomov, Rahimov va Tojievni ortga qaytardi

“A” guruhi qatnashchisi bo'lgan “Surxon” bu yil o'z oldiga Superligaga chiqish vazifasini qo'ygandi. Ammo jamoaning ishlari ko'ngildagidek kechayotgani yo'q. SHu bois rahbariyat kuni-kecha bosh murabbiyni o'zgartirishga qaror qildi. Tajribali Igor SHkvirin o'z arizasiga binoan istefoga chiqqan bo'lsa, uning o'rniga joriy mavsum boshida “Surxon”da bosh murabbiy Dilshod Nuralievga yaqindan yordam bergan Rifat Akramxo'jaev taklif etildi. Malumot uchun Akramxo'jaev bungacha ham bosh murabbiy sifatida sobiq – “NBU-Osiyo” jamoasini boshqargandi. Endilikda u “Surxon”ni kuchlilar safiga qaytarish uchun astoydil urinib ko'radi.

Bu hali hammasi emas. Sababi termizliklar chempionatning ayni o'rtasiga kelganida tajribali futbolchilar – Islom Inomov, Ibrohim Rahimov va Farhod Tojievni ham ortga qaytarishga qaror qildi. Muxlislarga yaxshi malumki, ushbu trio yozgi transfer oynasida termizliklar bilan xayrlashgandi. Endilikda ular navbatdagi turdan boshlab yana jamoaga yordam berish extimoli yuqori. SHu o'rinda ushbu masala bo'yicha har kimda turli savollar tug'ilishi tabiiy va bunga javoban shuni aytish o'rinliki, “Surxon” futbol klubi Islom Inomov, Ibrohim Rahimov hamda Farhod Tojievni transfer oynasi chog'ida futbolchilar ro'yxatidan chiqarib yubormagan. Aks xolda ularning yana termizliklar safiga qaytishiga xojat qolmasdi.