Unda O'zbekiston terma jamoasi barcha raqiblaridan ustun kelib Jahon chempioni nomiga sazovor bo'lgandi. Kecha saytimizda "Jahon chempionlarining qadri nega bunchalik past?" nomli maqola chop etilgandi.
Bugun terma jamoa bosh murabbiyi Jamshid Asadov biz bilan bog'lanib, O'FA mutasaddilari bilan uchrashgani va muammolar hal etilgani haqida malum qildi.
"Jahon chempioni bo'lib qaytganimizdan keyin bir qator tashkilotlar bolalarni tabriklashdi. O'FA esa Jahon chempionlarini Mustaqillik bayrami arafasida tabriklashni rejalashtirib qo'ygan ekan. Bayram o'tib ketdiku deyishingiz mumkin, xabaringiz bor Indoneziyada Osiyo o'yinlari musobaqasi sentyabr oyi boshida yakuniga etdi. O'FA rahbariyati mazkur musobaqada bo'lgani tufayli tabriklash yana biroz ortga surildi. SHu bois, yaqin kunlarda Umid Ahmadjonov ushbu mundialda ishtirok etgan barcha futbolchilarni tabriklaydi.
Bundan tashqari Jahon chempioni bo'lgan barcha bolalar imtiyozli ravishda O'zbekiston davlat Jismoniy tarbiya institutiga o'qishga qabul qilinadi. Bundan tashqari Mehribonlik uyida katta bo'lib, bugungi kunda "Olmaliq" va "Lokomotiv" futzal klublarida o'ynayotgan ikki bola ham imtiyozli ravishda o'qishga kiradi. Bu futzalchilarning yoshi biroz katta bo'lgani uchungina Jahon chempionatiga bora olishmagandi.
23-sonli Mehribonlik uyi terma jamoa bazasi bo'lgani uchun, ushbu Mehribonlik uyida jahon standartlariga mos mini-futbol maydoni barpo etiladi. Har yili terma jamoaga sport kiyimlari hamda inventarlar O'FA tomonidan taqdim etib boriladi.
Yana shuni qo'shimcha qilish lozimki, O'FA mening malakamni oshirib borish uchun futzal bo'yicha yoshlar terma jamoasiga yordamchi murabbiy bo'lib amaliyot o'tashimni taminlaydigan bo'ldi", - deydi biz bilan suhbatda Mehribonlik uyi bolalaridan iborat O'zbekiston terma jamoasi bosh murabbiyi Jamshid Asadov.
Bosh sahifaga
277
