Alisher Burxanovich Usmonov - 1953 yilning 9 sentyabr kuni Namangan viloyatining CHust shahrida dunyoga kelgan. Bolaligidan sportga befarq bo'lmagan yosh Alisher qilichbozlik bilan shug'ullana boshlagan va faoliyati davomida aytishga arzigulik yutuqlarga erishgan.
Uning hayoti va faoliyati haqida Vikipediya sahifasi va boshqa manbalarda juda ham ko'p va xo'p malumotga ega bo'lgansiz. Biz shunchaki Usmonovning chinakam sport fidoiysi va homiysi ekanligini yana bir bor eslatib o'tmoqchimiz. Nafaqat uning o'zi, balki turmush o'rtog'i Irina Viner Usmonova ham umrini sportga bag'ishlaganlardan.
Samarqand viloyatida tavallud topgan Irina badiiy gimnastika bo'yicha bir necha bor O'zbekiston chempioni bo'lgan. Viner xonim 1972-1992 yillar oralig'ida Toshkent shahri hamda O'zbekiston terma jamoasi murabbiyi sifatida faoliyat yuritgan. 1992 yili Moskvaga ko'chib o'tgan Irina Viner o'sha yilning o'zida Alisher Usmonov bilan turmush quradi.
Irina Viner 2008 yildan to shu kungacha Rossiya badiiy gimnastika federaciyasi prezidenti lavozimida ishlayapti. SHuningdek, terma jamoa murabbiyi sifatida ham faoliyat yuritmoqda. O'z o'rnida O'zbekiston badiiy gimnastikasiga ham yordam berib kelyapti.
Alisher Usmonov esa 2008 yilning 6 dekabridan to shu kungacha Xalqaro qilichbozlik federaciyasining prezidenti hisoblanadi. 2015 yili poytaxtimizda yoshlar o'rtasida o'tkazilgan jahon chempionati mezbonligi ham o'z-o'zidan yurtimizga berilgani yo'q. O'shanda bunday musobaqani o'zida qabul qilish istagida bo'lgan davlatlar etarlicha edi.
Eng muhimi, o'sha jahon chempionati uchun poytaxtimizga beg'araz yordam tariqasida taqdim etilgan va juda ham qimmat turadigan inventarlar bugungi kunda Andijon ixtisoslashtirilgan qilichbozlik markazida yosh sportchilarimizga xizmat qilyapti. Har bir yo'lakning bahosi 10 000 evrodan kam turmaydi. O'zi aslida qilichbozlik qimmat sport turlaridan biri hisoblanadi. Qilich va maxsus liboslarning “tozasi” jahon bozorida juda qimmat.
Yana bir fakt. O'zbekiston terma jamoasi muhim musobaqalar oldidan Rossiya terma jamoasiga qarashli Moskva viloyatida joylashgan zamonaviy qilichbozlik bazasida o'quv-mashg'ulot yig'inini o'tkazadi. Buning uchun esa hech qanday pul to'lanmaydi. Yangi, zamonaviy “Paxtakor” stadioniga qilinayotgan homiylik esa alohida mavzu.
Istiqlolimizning 27 yillik bayrami arafasida Usmonov Alisher Burxanovich O'zbekiston Respublikasi Prezidenti farmoniga ko'ra “El-yurt hurmati” ordeni bilan mukofotlandi.
Fursatdan foydalanib, Alisher Usmonovni Davlat mukofoti hamda bugungi tavallud ayyom bilan samimiy muborakbod etamiz. O'zbek sporti rivojiga qo'shayotgan hissasi uchun Alisher Burxanovichga kuch-quvvat tilaymiz.
Kamoliddin ALIMOV va SA jamoasi
Bosh sahifaga
224