“Cementchi” yig'inni boshladi. Tarkibda o'zgarishlar yuz bermoqda

Klub matbuot xizmatining xabar berishicha, jamoa kecha Quvasoydagi qarorgohida yig'ilgan. Murabbiylar shtabining rejasiga ko'ra, hozircha futbolchilar kuniga bir mahaldan shug'ullanmoqda. Tarkibdagi o'zgarishlarga keladigan bo'lsak, o'tgan mavsum “Cementchi” sharafini himoya qilgan Jahongir Dadaboev huquqiy jihatdan “Neftchi” o'yinchisi sanaladi. Uning ijara muddati nihoyasiga etgach, “Cementchi”ga qaytmagan. Markaziy yarim himoyachi Nodirxon Kamolov kuni-kecha “Olmaliq” yig'iniga borib qo'shildi. Azizxon Ibragimov esa “Qo'qon-1912” mashg'ulotlarida ishtirok etmoqda. O'tgan mavsum jamoaning to'purari bo'lgan Elyor Akbarov ham oliy liga klubi bo'lmish – “So'g'diyona”da ko'rikdan o'tayotganini aytish lozim. SHuningdek Asror Tilavoldiev, Ibrohim No'monov hamda Abdullajon Mirzaev kabi futbolchilar bilan ham klub xayrlashishga qaror qilgan.

Yig'inga kelib qo'shilgan yangi futbolchilar ham yo'q emas. “Orol”ning etakchilari bo'lib kelayotgan Erbol Seytnazarov bilan Nurlibek Talasboev ayni damda quvasoyliklarning mashg'ulotlarida ishtirok etmoqda. “Kosonsoy”dan esa Sardor Sotvoldiev tarkibga kelib qo'shilgan. O'tgan mavsum “Yozyovon-Lochinlari” safida harakat qilgan Vladlen Norov ham bugungi kunda “Cementchi” yig'inida qatnashayotganini takidlash joizdir.

Murabbiylarning rejasiga ko'ra, birinchi bosqich yig'inida sinov-nazorat uchrashuvlarini ham o'tkazish ko'zda tutilgan. Xususan 13 yanvar kuni Farg'onada “Neftchi” yoshlar jamoasiga qarshi maydonga chiqilsa, 19 yanvarda Andijonda “UzDongJu” bilan kuch sinashadigan bo'lib turibdi.