Malumki, shu paytgacha Eron terma jamoasi bilan Toshkentda to'rt marta o'ynaganmiz. Bugungi uchrashuv beshinchisi bo'ladi. Afsuslanarlisi, bo'lib o'tgan to'rtta o'yinning birortasida g'alaba qozonish tugul hatto gol ura olmaganmiz.
2012 yilning 3iyun sanasida "Jar" stadionida bo'lib o'tgan bahsda Odil Ahmedov gol urgandi, biroq uni yaponiyalik hakam Yuichi Nishimura hisoblamagan. O'shanda hakam to'p darvoza chizig'ini kesib o'tmadi deya toza golimizni inobatga olmagandi.
Eron bilan o'zimizda bo'lgan avvalgi o'rtoqlik uchrashuvida 0:0 o'ynaganmiz, uchta rasmiy o'yinda esa bir xil 0:1 hisobida mag'lub bo'lganmiz. Biz xohlardikki, bugungi bahsda yigitlar mana shu "qora anana"ni yo'qqa chiqarib, tarixda birinchi bor Eronni Toshkentda mag'lub etishsa.
Albatta, Ektor Kuper o'z uslubiga sodiq qolib bugun yanada chuqurroq himoyani yo'lga qo'yishi mumkin, lekin futbolchilarimiz shu paytgacha Eronga qarshi bellashuvlar qanday o'tganini juda yaxshi bilishadi va shuni bilgan holda g'alaba uchun o'ynaydilar.
Garchi o'rtoqlik darajasida bo'lsa ham, Eronni mag'lub etish biz uchun muhim deb o'ylayman, chunki bu ham futbolchilarning o'ziga bo'lgan ishonchini orttiradi, ham Kuperning elkasidan tog' ag'dariladi. Murabbiy sal bo'lsa-da o'zini engil his qiladi.
SHunday ekan, bugun terma jamoamizdan yaxshi o'yin bilan birga ijobiy natija kutib qolamiz. O'rtoqlik maqomida bo'lsa ham yigitlar Eronni yutishiga tilakdoshmiz. Toshkentda Eronni bir marta yutsak, ishoning muxlislarning "vuuu" deb stadiondan ketishlariga boshqa sabab qolmaydi.
Ektor Kuper qanday tarkib va taktika tanlamasin, futbolchilardan faqat g'alaba kutib qolamiz.
Bosh sahifaga
119