Bugun futbol. "Metallurg" - "Lokomotiv"

Amaldagi chempion Bekobodda "Metallurg" mehmoni bo'ladi. Xabaringiz bor, 22-tur o'yinlaridan so'ng jamoalar oltitadan ikki guruhga bo'lindi. Bugun bo'lib o'tadigan "Metallurg" - "Lokomotiv" bahsi bilan birinchi oltitalik uchun 2-bosqich o'yinlari start oladi.

Ikkinchi bosqich oldidan "Lokomotiv" "oltin ochkolar" qoidasiga ko'ra 18 ochko bilan 2-o'rinda bormoqda. "Metallurg" esa 9 ochko to'plab 5-o'rinni egallab turibdi. Bugun "Metallurg" o'z maydonida joriy mavsum hisobidan "Lokomotiv"ga qarshi ikkinchi o'yinini o'tkazadi. Birinchi bellashuvda maydon egalari 2:0 hisobida zafar quchishgan.

Umuman olganda bu yil "Metallurg" "Loko"ga qarshi yaxshi harakat qilmoqda. CHunki jamoa Toshkentda 1:1 o'ynagan. Xullas "Loko" hozircha bekobodliklarni mag'lub eta olgani yo'q. "Metallurg" birinchi bosqichda o'z maydonida 11ta o'yin o'tkazib, shundan 6tasida zafar quchdi, 3 bor durang o'ynab 2 marta mag'lub bo'ldi. To'plar nisbati 13-11.

Bilasizmi? "Metallurg" oxirgi to'rtta o'yinning uchtasini g'alaba bilan yakunladi. Andrey SHipilov shogirdlari o'z uyida "Neftchi" va "Qizilqum" hamda safarda AGMKdan ustun kelgan.

"Lokomotiv" haqida to'xtaladigan bo'lsak, "temiryo'lchilar" oxirgi 9ta o'yindan beri mag'lub bo'lmay kelishmoqda. Jamoa oxirgi marta 13-turda aynan bugungi raqibi "Metallurg"ga imkoniyatni boy bergandi. Ko'ramiz, bugun "Loko"ning mag'lubiyatsiz seriyasiga yana "Metallurg" chek qo'ya oladimi?

Safarda 11ta o'yin o'tkazgan "Lokomotiv" shundan beshtasida g'alabaga erishgan. Toshkentliklar ikki bor durang o'ynab, 4 marta yutqazib qo'yishgan. To'plar nisbati 14-11. "Loko" safardagi oxirgi g'alabasini 22-turda "Buxoro" ustidan 1:0 hisobida nishonlagan.