"Bunyodkor" va Simonenko. Aslida vaziyat qanday?

"Bunyodkor" safida 2014 yil Sergey Simonenko degan futbolchi o'ynagan. 2018 yilga kelib FIFA mana shu futbolchi kasriga "Bunyodkor"ni Superligadagi 6 ochkosidan mahrum qilishi ham mumkin. Nega? CHunki Simonenko yozib bergan FIFAga pulimni berishmayapti deb. Gap taxminan 400 000 000 so'm (hozirgi kursda deyarli 50 000 dollar) ustida ketmoqda.

Simonenko 2014 yil yarim yilgina o'ynagan va 14 ta uchrashuvda ishtirok etgan: 1 ta superkubok, 1 ta kubok, 5 ta Oliy liga va 7 ta CHempionlar ligasi. SHu bilan u "Bunyodkor" uchun kerak bo'lmay qolgan (aslida ham kuchli legioner bo'lmagan). "Bunyodkor" rahbariyati 2014 yilning yozida klubdan ketgan futbolchiga keyinchalik ikki marta pul tashlagan:

2015 yil, 4 avgust — 152 000 000 so'm
2016 yil, 4 aprel — 127 000 000 so'm

Qizig'i, pullar so'mda futbolchining plastik kartochkasiga tashlab berilgan (yanada qizig'i Simonenko allaqachon mamlakatdan chiqib ketganidan keyin). Ko'rinyaptiki, Bunyodkor rahbariyati FIFAdan qo'rqib, pul tashlayvergan (bu paytda plastik qaysi teshiklarda yotgani hech kimga malum emas). Hech bo'lmaganda so'm O'zbekistondan boshqa joyda o'tsa ham mayliga edi.  

FIFA hozirgacha ishni yopmagan. CHunki pul futbolchining qo'ligacha etib bormagan (garchi O'zbekiston degan xotamtoy yurtda uning nomiga har yili pul o'tkazib turadigan rahbarlar bo'lsa ham). Simonenko negadir Toshkentga qaytishga qo'rqib qolgan (qo'rqitishmagan deb umid qilaylik). Biroq u kelmagunicha, pulini hech kim ololmaydi. Hech bo'lmaganda hozir yurgan Ispaniyasidan turib agentigami (balki biror do'stiga) ishonchnoma yozib berishi kerak, bankda saqlanib turgan pulini olish uchun. Keyin bu pul bir amallab valyutaga almashtiriladi va undan keyin Simonenkoga etkaziladi.

"Bunyodkor"ning hozirgi rahbariyatini tushunish mumkin. Biroq bu tushunishni FIFAga tushuntirib bo'lmaydi, FIFA bu qadar mayda (biz uchun mayda emas sira ham) ishlarga har yili bir martadan vaqt ajratolmaydi. Endi kimdir Simonenko bilan ko'rishib olib, masalani echishi kerak, - deb yozadi Diyor Imomxo'jaev telegramdagi o'z kanalida.