"Navbahor" bosh murabbiyi haqida futbolchi Ro'zimboy Ahmedov aytgan gaplar bugun eng ko'p mavzu qilinyapti.
Men "Navbahor" bosh murabbiyiga ham, futbolchiga ham ishonmayman. O'rtada pullik masala turganidan keyin bunday mojarolarning chiqishi oddiy bir hol. Ammo futbolchi qilgan ishni oqlamayman.
Birinchidan, murabbiy shaniga tegadigan gaplari ko'p. SHuning o'ziga uni sudga berish mumkin.
Ikkinchidan, agar futbolchining "Navbahor"dan ketishida biror qoidabuzarlik (yoki qonun) bo'lsa, unda mazkur ish yuzasidan Professional futbol ligasiga murojaat qilish huquqi bor. SHu yilning o'zida bu kabi o'ttizga yaqin futbolchining masalasi ijobiy tomonga hal qilib berildi.
Uchinchidan, murabbiy o'z funkciyalarini bajarishi va aqli etmaganiga aralashmasligi kerak. Murabbiy natija uchun, mashg'ulotlar uchun, klubning maydondagi falsafasi uchun javobgar bo'lgan shaxs. Klublar bosh direktorlari (menejer) esa shartnomalar, hisob-kitob kabi ishlarni joyiga qo'yishi kerak. O'zbekiston futbolini orqaga tortadigan eng ahmoqona ishlardan biri aynan murabbiylarning o'z vazifasidan ortiq masalalarga davogarlik qilishidir.
Professional futbol ligasi bunday ishlarni nazorat qilish yuzasidan allaqachon ish boshlagan. 2018 yil so'ngiga qadar barcha futbol klublariga FIFA qoidalari asosida tayyorlangan shartnoma nusxasi taqdim etiladi. Mazkur shartnomalarga klub va futbolchi o'z shartlarini, qo'shimchalarini kiritishi mumkin. Biroq u yoki bu tomonning shartnomani bekor qilishi, qarzdorliklar va boshqa qator masalalar bunda konkretlashtiriladiki, futbolchilarda ig'vo, fisq-u fasod uchun hojat qolmaydi.
Endilikda O'FA Xavfsizlik boshqarmasi Ro'zimboy Ahmedov bilan albatta ko'rishadi (futbolchi aytganlari uchun javob berishi kerak). Uning fikrlarida qanchalik jon borligi, Mo'minjonovning aslida qanday faoliyat olib borayotgani yuzasidan tekshiruv bo'ladi (o'zini hurmat qilgan klub sifatida buni "Navbahor"ning o'zi amalga oshirishi kerak aslida).
Avval ham aytganman, yana takrorlayman. Oilasini harom pullar bilan boqayotgan va o'yinlarni sotish orqali totalizatordan pul ishlayotganlar oramizda ko'p. Ularning aynan kimligini esa fakti bilan bilmaymiz. Ularning qo'lga tushishi va asl yuzi fosh bo'lishini oddiy bir muxlis sifatida juda istagan bo'lardim.
Bosh sahifaga
132