Tur markaziy uchrashuv bilan boshlanadi. "San Siro" stadionida "Inter" jamoasi "Fiorentina"ni qabul qiladi.
Mezbonlar bu o'yinga fantastik kayfiyatda etib kelishdi desak xato bo'lmaydi. "Inter" o'tgan hafta ECHL 1-turi doirasida "Tottenxem"ga qarshi bahsda 90+2 daqiqada gol urib g'alabani ilib ketgan bo'lsa, dam olish kunlari A Seriya 5-turi doirasida "Sampdoriya" bilan bellashuvda 90+3 daqiqada Marselo Brozovich kiritgan gol evaziga 3 ochkoga ega bo'ldi. Lekin, "Sampdoriya"ga qarshi uchrashuvda kiritilgan golni nishonlashda haddan tashqari ehtiroslarga berilib ketgan milanliklar bosh murabbiyi Luchano Spalletti bitta o'yinga diskvalifikaciya qilingan. Demak, u bugun tunda jamoasini chiziq yonida boshqarib tura olmaydi. Ko'ramiz, "ko'k-qoralar" ustozlarisiz murakkab raqibni enga olishadimi?
"Fiorentina" ayni paytda "Inter"dan ko'ra tomoshabop futbol o'ynamoqda. Stefano Pioli boshchiligidagi florenciyaliklar A Seriyadagi eng yosh jamoa hisoblanishadi. Yosh tarkibni hujumkor o'ynatayotgan murabbiydan bugun ham odatiy o'yinni kutsak bo'ladi. Jamoa joriy mavsum "Sassuolo"dan keyin "Yuventus" bilan birga eng ko'p gol urgan klub bo'lib turishibdi. Mehmonlarning quvnoq o'yini muxlislarni o'ziga tortmoqda. To'g'ri, jamoa hozirga kelib jiddiy raqiblardan faqat bittasi bilan uchrashdi va unda ham mag'lub bo'ldi ("Napoli"ga 4-turda). Muhimi esa bu jamoaning o'yinlarini kuzatish qiziq bo'lmoqda. Ayniqsa, jamoaning hujumdagi uchligi Keza-Simeone-Pyaca sermahsullik borasida o'zlarini ko'rsatishmoqda. SHuningdek, gol urish borasida Marko Benassi ham o'zini eslatib qo'ymoqda.
Xullas, bugun futbol muxlislarini 23:59dan boshlab "Inter" - "Fiorentina" bellashuvini tomosha qilishga chorlab qolamiz. Ketgan vaqtingizga achinmaysiz.
Qiziqarli faktlar:
- "Inter" barcha musobaqalar doirasida "Fiorentina"ga qarshi o'z uyida o'tkazgan oxirgi 17ta uchrashuvdan 15tasida g'alaba qozongan;
- Bu jamoalar "San Siro"da so'nggi marotaba 1996 yilning noyabr oyida durang o'ynashgan. O'shanda 2:2 hisobi qayd etilgan;
- O'tgan mavsum bu jamoalarning Milanda o'tgan bahsida "neradzurrilar" 3:0 hisobida ustun kelishgan.
A Seriya, 6-tur
25.09.2018, 23:59
"San Siro", Milan
"Inter" - "Fiorentina"
Bosh hakam: Paolo Silvio Maccoleni
Taxminiy tarkiblar:
"Inter": Xandanovich – D’Ambrozio, SHkrinyar, de Vrey, Asamoa – Vesino, Brozovich – Kandreva, Nainggolan, Perishich – Ikardi.
"Fiorentina": Lyafont – Milenkovich, Pesselya, Vitor Xyugo, Biragi – Edimilson, Veretu, Benassi – Keza, Simeone, Pyaca.
O'ynamaydi: SHime Vrsalko ("Inter").
"Fiorentina" forvardi Federiko Keza o'tgan turda SPAL darvozasiga jamoasining uchinchi golini kiritganidan so'ng uni maydon chetida "ballboy"lik qilayotgan kichkina ukasi bilan nishonladi.
Italiya chempionati turnir jadvali >>>>> A Seriya
Bugun namoyish etiladigan futbolga oid ko'rsatuvlar jadvali (Sport TV, Match TV, Futbol TV)
Bosh sahifaga
489