Farhod Tojiev: "Avvalgidek ketma-ket gollar urishga umid qilaman"

"Bugungi uchrashuv biz uchun og'ir kechdi. O'tgan turda “Xorazm”ni yirik hisobda mag'lub etganligimiz tufayli bugun jamoamizdagi yosh futbolchilar nima uchundir bir oz sustroq harakat qilishdi.

Raqiblarimiz “Istiqlol” juda yaxshi jamoa, futbolchilarining darajasi bir xil. Bunday jamoalarda bir futbolchi jarohat olsa yoki boshqa sabablar tufayli maydonga tusha olmasa, boshqa sherigi uning o'rnini to'ldirib keta oladi. “Surxon”da o'ynayotgan yosh futbolchilarda o'zlariga bo'lgan ishonch etishmayapti. Bu holatni mashg'ulotlarda murabbiylar hamda tajribali futbolchilari birgalikda tushuntirib bormoqdamiz.

O'ylaymanki, “Surxon” kelajakda  juda kuchli jamoa bo'lib etishadi. Bugungi uchrashuv shu hisobda yakunlanganligi biz uchun juda achinarli xol, biz o'z oldimizga yuqori maqsadlarni qo'yganmiz, yosh futbolchilarimizda o'zlariga bo'lgan ishonchni shakllantirsak, hammasi yaxshi bo'ladi.

Muxlislarimizga sabr tilayman, birdaniga  yuqori natijaga erishib bo'lmaydi. Muxlislarni tushunaman, ular juda talabchan bo'lishadi. Men muxlislaridan iltimos qilardim, ozroq sabr qilinglar, hali hammasi yaxshi bo'ladi. SHaxsan o'zim jarohatim tufayli to'liq tiklanishga ulgurmagan bo'lsamda, "Surxon" uchun maydonga tushib, astoydil harakat qilayapman.  G'alaba qozonish faqat tajribali futbolchilarga bog'liq emas, futbol jamoaviy o'yin, hammaning o'ziga yarasha vazifasi bor.

Surxondaryolik futbol muxlislariga kerak bo'lsa safardagi uchrashuvlarga borib, har doim bizni qo'llab-quvvatlagab kelayotganliklari uchun minnatdorchilik bildiraman.  
Ushbu mavsumda meni jarohatlar ko'p bezovta qildi. Futbolchi jarohat olganidan so'ng maydonga qaytib birdaniga yaxshi o'ynab ketishi qiyin, tiklanishi, o'z o'yinini topib olishi uchun bir oz vaqt kerak bo'ladi. Men ham hozircha o'z o'yinimni topib olganim yo'q, o'zim uchun ham bu xol achinarli albatta. Qaysi ligada to'p surgan bo'lsam jamoam g'alabasi uchun o'z hissamni qo'shganman, gollar urganman. Endi yanada ko'proq ishlayapman, hammasi yaxshi bo'lishiga, avvalgidek ketma-ket gollar urishimga umid qilaman", - deydi Farhod Tojiev.    
 

Bekzod Tolibov yozib oldi.

“Surxon” matbuot xizmati bilan xamkorlikda tayyorlandi.